Ақсуда күйеуі үйінен қуып жіберген әйел құдықта тұрып жатыр. Әйелге азық-түлік жеткізетін қала тұрғыны оның тағдыры туралы видео жариялады, деп хабарлайды Neonomad.kz ақпараттық агенттігі Nur.kz сайтына сілтеме жасап. 

Айнұрдың оқиғасы туралы видео YouTube желісіндегі «Культурный 14 Регион» каналында жарияланды.

Белгілі болғандай, видеоның авторы түрлі жағдайлармен далада қалған жандарға азық-түлік  жеткізеді екен. Солардың ішінде Айнұрда бар. Сөзіне қарағанда, оны күйеуі үйінен қуып жіберген. Шарасыздан ол кәріз жүйесінде тұруға мәжбүр.

Сұхбат барысында Айнұр Ақтау қаласының тұрғыны екенін айтты, бірақ кейін Ақсу қаласына көшіп, сол жерге тұрмысқа шығыпты. Неге екенін білмейді, бірақ оны жұбайы қуып шыққан. Содан бері Айнұр құдықты паналауға мәжбүр.

«Күйеуім үйден кетуімді сұрады. Мен оны көп рет кешірдім…», – деді ол көз жасына ерік беріп.

Соңғы жылдары Айнұр бірнеше рет қиындықтарға тап болды. Енді әйел адам көше кезіп қалды.

Келіншектің қиын тағдырына жаны ашыған видео авторлары Айнұрдың ата-анасымен байланысып, қызының қай жерде және қандай жағдайда өмір сүруге мәжбүр екенін айтып берді.

«Мама, маған көмектесші, мен далада қалдым», – деп жалынды Айнұр.

Әйел адам анасынан үйге қайтар жолға ақша сұрады.

Бұл оқиғаның қалай аяқталатыны әлі белгісіз. Видео авторлары туыстары әйелге көмектеседі деп үміттенуде.