Қажылыққа 100 рет барғанын дүркіретіп тойлаған Амангелді Еренғайып қоғамның наразылығын тудырғаны рас. Енді Қазақстан Мұсылмандары Діни басқармасынан ескерті алды, деп хабарлайды Neonomad.kz ақпараттық агенттігі Azattyq-ruhy.kz сайтына сілтеме жасап. 

Мекке-мединеге жыл сайын 3 мыңнан астам қазақстандық барады екен. Олардың барып-келуін ұйымдастыратын елімізде 20 фирма тіркелген. Бүгінде ҚМДБ ресми түрде танып, етене жұмыс істейтін 20 туристік фирма бар. Амангелді Еренғайыпұлына тиесілі «Нұр-Қазақстан» компаниясы да солардың бірі. Оның президенті де қажылыққа жұмыс бабымен, жол көрсетіп барады.

Қажылық бөлімінің меңгерушісі Жанділда Бекжігітовтің айтуынша, шариғатта қажылыққа баруға шектеу қойылмайды. Бірақ, құлшылықтың қанша рет жасалғанын жалпақ жұртқа жариялауға тыйым салынады.

«Діни басқарма фирма басшыларына, қажылыққа қызмет етіп жүрген адамдарға қоғамның ашуын тудыратын, құлшылықты бұзатын, құлшылыққа кері әсерін тигізетін осындай іс-әрекеттерге бармаса екен деп ескертеді. Бұл қоғамда жағымсыз пікір қалыптастырды. Оны исламтанушылар да айтып жатыр. Пайғамбарымыздың әдемі хадисі бар: кедей, міскін адам шақырылмаған дастарханның хайыры жоқ дейді. Ал енді өңкей игі жақсыларды жинап алып той жасауы шүкіршіліктің форматына келмейді. Ол – даңғазалық, мақтаншақтық «, – деді ҚМДБ Қажылық бөлімінің меңгерушісі Жанділда Бекжігітов.