Қоғам қайраткері Мұхтар Тайжан достарымен партия ашатынан сөз қылды, деп хабарлайды Neonomad.kz ақпараттық агенттігі SN.kz сайтына сілтеме жасап.
«Қазір біраз белсенділер партия құрамыз деп жатыр. Бұл дұрыс я табиғи нәрсе деп білем. Елімізде көп партия болуы қажет. Бізден үш есе халқы аз Қырғызстанның өзінде 200-ден астам партия бар. Ал бізде небары 6-7 партия ғана…Заң жүзінде бұндай мүмкіндік ашылса, біз де достарыммен бірге партия ашамыз деп жоспарлап отырмыз. Саяси бәсекелестіктің арқасында ғана қоғам дамиды» – дейді Мұхтар Тайжан.
Мүмкіндік болса, бір партияға жетекшілік еткісі келетінін айтқан Тайжанға қолдау көрсеткендер көп болды. Мысалы, Дина Елгезек: «Лидер болуға қарым-қабілет бар бойда! Онда неге ашпасқа?», – деп жазды.
Ал оппозиция өкілі Жәнібек Қожық: «Сайлау туралы, партия туралы заң өзгермей тұрып партия құру – біздің қоғамда дұрыс емес, уақыт өткізу, қаражат шашу, бос әурешілік болады», – деп қарсылық танытып отыр.
Сондай-ақ, Алім Ұлы Жақайым деген ру атымен тіркелген бүркеншік есімді желі қолданушы: «Мен, мәселен, осы біздегі заңды түрде тіркелген партияларды неше жыл зерттеп-зерделеп, анализ жасап көрдім. Бәрі бір-біріне ұқсайды және ойы да бір, сөзі де бір, пікірі де бір. Логикалық тұрғыдан алып қарасақ, бұл мүмкін емес нәрсе! Сондағы біздің партия құрудағы мақсат-мүддеміз не? Халық үшін бе, әлде, демократиялық имиджді қалыптастыру үшін бе?» – деп жазды.
