Алматы қаласында 1-сынып оқушысы мектеп терезесінен құлап кетті. Қалалық денсаулық сақтау басқармасы аталған ақпаратты растады, деп хабарлайды Neonomad.kz ақпарат агенттігі.
Әлеуметтік желіде тараған ақпаратқа сәйкес, оқиға №80 мектепте болған. Айтуларынша, қазақ тілі пәнінің мұғалімі оқушыны байқамай қамап кеткен. Балалар осылайша оқушының сыныпта жалғыз қалып қойғанын айтады. Сондай-ақ, желідегілер мұғалім сыныпты тексерген кезде оқушының парта астына жасырынып қалғанын бөлісті.
Артынша сыныптың жабық екенін көріп, шошыған оқушы терезеден секіріп кетіпті-мыс. Оны жоғары сынып оқушылары тауып алған. Оқушы түрлі жарақатпен ауруханаға жеткізілді.
Қалалық денсаулық сақтау басқармасындағылар аталған ақпаратты растады. Олардың мәліметінше, мектептің екінші қабатының терезесінен құлап кеткен оқушы бас сүйек-ми жарақатын алып, миы шайқалып, кәрі жілігі сынған. Дәрігерлер баланың жағдайы тұрақты деп бағалап отыр.
«Балаға қосарлас жарақат, бас сүйек-мидың жабық жарақаты, мидың шайқалуы, көкірек қуысының жарақаттануы, көкірек қуысы ағзаларының жаралануы, кәрі жілігінің жабық сынығы диагнозы қойылды. Ол жансақтау бөліміне жатқызылды. Бүгінде әрі қарай ем-дом жасалуы үшін травматология бөліміне ауыстырылды», – дейді денсаулық сақтау басқармасындағылар.
Сурет: ampravda.ru
