Мәжіліс депутаттары «Бек Эйр» компаниясынан құлаған ұшақтың жолаушыларына моралдық шығын ретінде өтемақы өндіріп алуды сұрап отыр. «Ақ жол» партиясының төменгі палатадағы фракциясы премьер-министр мен бас прокурорға осындай депутаттық сауал жолдады, деп хабарлайды Neonomad.kz ақпарат агенттігі Sputnik Қазақстан сайтына сілтеме жасап.

Мәжілісмен Азат Перуашевтің айтуынша, Bek Air басшылығының трагедиядан кейін үкіметтік комиссияның ресми қорытындысын күтпей, ел алдында апатқа қатысты өз болжамдарын жария етуі мүлде дұрыс болмаған. Компанияның бұл мәлімдемесін қоғамдық пікір мен тергеу барысына ықпал етуге ұмтылу деп бағалауға болады.

«Адамдық және іскерлік этика тұрғысынан компания басшылығы алғашқы сәттен-ақ зардап шеккендердің жанынан табылып, шынымен көмек көрсетуі тиіс еді. Ауруханаларға түскен адамдардың хәлін сұрап, марқұмдардың отбасыларына баруы керек еді», – деді Перуашев.

Ол 13 адамның өмірі қиылып, көбі мүгедек болып қалғанын, ал олардың отбасылары асыраушысы мен үмітінен айырылғанын атап өтті.

«Құдай сақтасын, алайда бұл жағдайда кез келген жауапты компания тек заңды өтемақы ғана емес, сонымен бірге өздеріне пайда әкеліп отырған адамдарға өз еркімен қосымша қолдау көрсету мүмкіндігін қарастыруы тиіс еді», деді Перуашев.

Бірақ, депутаттың сөзінше, әуе компаниясы тарапынан заңды өтемақы да, басқа қолдау шаралары жасалмаған.

«Халық «Бек Эйр» компаниясының өкілдерін ауруханалардан да, марқұмдарды жерлеу рәсімінен де көрген жоқ. Компания баспасөз арқылы тек көңіл айтты. Құдды трагедияға еш қатысы жоқ бөтен тарап секілді. Кінәні тағы да сол көз жұмған ұшқыштарға арта салатындай көрінеді. Өлгендер өз-өзін қорғай алмайды. Бұл әділдік пе сонда?», – деп ашынды мәжілісмен.

Әуе тасымалдаушы жолаушыларға трагедиядан кейін тоқтатылған рейстер үшін билет ақшасын әлі қайтармаған.

«Үкіметтік комиссияның жұмыс істеп жатқанына бір ай болса да, «Бек Эйрдің» кінәлі қызметкерлеріне қатысты да, не басқа да жауапты тұлғаларға қатысты ақпарат жоқ. Ешкім кек алуды немесе кінәсіздерді жазалауды талап етіп отырған жоқ. Бірақ, ең болмағанда, осы әуе апатынан қаза тапқан азаматтарымызға қатысты әділдік болуы тиіс», – деді депутат.

Осыған байланысты «Ақ жол» фракциясы «Бек Эйр» компаниясынан құлаған ұшақтың жолаушыларына моралдық шығын ретінде өтемақы өндіріп алуды сұрады. Сондай-ақ, өкілетті органдарға тоқтатылған рейстер үшін жолаушыларға билет ақшасын қайтаруды қамтамасыз етуді тапсыру керектігін, қоғамды трагедияға қатысы бар күдіктілерге қатысты шаралардан хабардар ету қажеттігін айтты.

Бұдан бөлек, парламент басшылығына тергеудің ресми қорытындысы бойынша елдегі ұшу қауіпсіздігінің жай-күйі туралы парламенттік тыңдау өткізу мәселесін қарастыруды ұсынды.

Алматыдағы ұшақ апаты

Трагедия 2019 жылдың 27 желтоқсанында таңғы сағат жетіде болды. Bek Air әуе компаниясының «Алматы – Нұр-Сұлтан» бағытындағы Fokker 100 ұшағы Алматы маңына құлады.

Ұшақта 93 жолаушы мен 5 экипаж мүшесі болған. Апат 12 адамның өмірін қиды, қаза болғандардың ішінде ұшақ командирі бар. Ал 28 қаңтарда екінші пилот Мейіржан Молдақұлов ауруханадан шыққаннан кейін бір жұмадан соң қайтыс болды.

Президент тапсырмасымен премьер-министр жетекшілік ететін комиссия құрылды. Үкіметтік комиссия апат себебінің алдын ала болжамын жариялады. Негізгі себеп – ұшақ сыртына мұздың қатып қалуы. Әуе кемесі тұрақта екі тәулік тұрған.

Тоқаев апаттың себебін анықтап, кінәлілерді қатаң жазалауды тапсырды.

28 желтоқсан елімізде жалпыұлттық аза тұту күні болды.