Бүкіл әлемге тарыдай тараған қандастарымызға қазақ куәлігі берілетін болды, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап.
Дүниежүзіндегі қазақ диаспорасын қолдау мақсатында мемлекеттік бағдарлама әзірленіп жатыр. Бұл туралы «Отандастар» қорының бірінші вице-президенті Талғат Адуов мәлімдеді. Оның сөзінше, бағдарлама аясында этникалық қазақтар арнайы куәлік алатын болады.
«Диаспораларды қолдаудың мемлекеттік бағдарламасы дайындалуда. 2020 жылдың көктеміне қарай біз оны аяқтауды жоспарлап отырмыз. Мемлекеттік бағдарлама ел басшылығы деңгейінде таныстырылады», – деді Талғат Адуов Омбыдағы Қазақстан мен Ресейдің өңіраралық форумы аясында өткен бизнес-форумда.
Мемлекеттік бағдарламаның мүмкіндіктері туралы толығырақ жариялау үшін 2020 жылдың көктемінде «Отандастар» қоры отандастар форум өткізбек.
«Мемлекеттік бағдарламада жақсы тетіктер бар, мысалы, қазақтың куәлігі. Бұл шетелдегі қандастарымызға Қазақстанда саяси құқықтардан басқа көптеген құқықты біздің елдің азаматтарымен тең жағдайда пайдалануға мүмкіндік беретін құжат», – деді «Отандастар» қорының бірінші вице-президенті.
Айта кету керек, «Отандастар» қоры 2017 жылы Қазақстанның Тұңғыш Президенті Нұрсұлтан Назарбаевтың тапсырмасымен құрылды.
