Алматыдан елордаға ұшу керек болған 31 жастағы кәсіпкер соңғы уақытта ұшудан бас тартады. Сөйтіп апат болған сәтте ол намаз оқып жатқанын айтты, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап.
31 жастағы елорда тұрғыны Бауыржан Самен көлік тұрағын және көлікті жалға беру саласында жұмыс істейді. Екі әріптесімен сенбі күні Алматыға келген ол 27 желтоқсанда астанаға кері қайтуы керек болған. Қолдарында «Алматы – Нұр-Сұлтан» бағытындағы Bek Air ұшағына билеттері бар. Алайда жұмыстарын бітіре алмаған жас кәсіпкер Алматыда кідіруге шешім қабылдайды.
«Алматыдағы жұмыстарым біткен жоқ. Бүгін билетті айырбастаймын деген ой болған. Bek Air компаниясына хабарластым. Олар ұшаққа отырмаған жағдайда билетімнің қайтарылмайтынын, оның жарамсыз болып қалатынын айтты. Жаңа жыл қарсаңында билеттің арзан емес екені белгілі. Соған қарамастан шаруаларымды бітіріп алайын деген шешімге келдім. Осылайша, ұшаққа отыру туралы ойымнан бас тарттым», – дейді Бауыржан Самен.
Бауыржанның екі әріптесі де осындай шешім қабылдап, ұшаққа отырмағанын айтты.
27 желтоқсан күні таңғы сағат 07.22 кезінде Алматы маңында Bek Air компаниясының ұшағы апатқа ұшырады. Осы уақытта Бауыржан таңғы намазын оқып жатыпты. Ол қайғылы жағдайды жаңалықтардан естіп, абдырап қалған.
«Бұл ұшаққа мен де отыруым қажет болған. Біздің тікұшақ, біздің рейс, біздің уақыт, оны мен тексердім. Жаңалықты өте ауыр қабылдадым, көңіл-күйім толқып кетті. Алла сақтады, оған күмәнім жоқ. Қаза тапқан адамдардың ішінде мен де болуым мүмкін еді. Мені қойшы, ата-анам, туған-туыстарым қайғырады ғой. Бұл жаңалық оларға ауыр тиері анық. Достарым мені Алланың қолдағанын, оның маған жоспары бар екенін, екінші туған күнімнің пайда болғанын айтты, – дейді жеке кәсіпкер ағынан жарылып.
Ұлы отыруы керек болған ұшақ апат болғанын жаңалықтардан естіген анасының жүрегі ауырып қалған.
«Кейін кішігірім құран оқытып, садақа бердім. Апаттан қаза тапқандардың отбасының қайғысына ортақпын. Оларға құдай күш-қуат берсін. Барлығы жақсы болсын деп тілейік», – деді ол.
Еске сала кетсек, 27 желтоқсан күні Bek Air әуекомпаниясының ұшағы (Z9-2100) Алматыдан елордаға ұшуы керек болған. Бірақ Қызыл ту ауылы маңында апатқа ұшыраған. Ұшақтың үшініде 95 жолаушы болған.
Кейін ұшақ апатынан 12 адам қаза тапқаны белгілі болды.
Қасым-Жомарт Тоқаев ұшақ апатына қатысты кінәлілер заңға сәйкес жазаланылатынын айтты.
Сонымен қатар, ұшақ апатынан қайтыс болғандардың арасында Генералдар кеңесінің төрағасы Рустем Хайдаров та бар.
Өкінішке орай, тағы бір танымал адам көз жұмды. Informburo.kz ақпараттық сайтының редакторы Дана Круглова да осы ұшақта болған. Әріптестері журналистің қаза тапқанын растады. Толығырақ оқыңыз.
Тоқаев 28 желтоқсан күнін жалпыұлттық азалы күн деп жариялады.
