Сириядан отанға келген оралдық Динара Ескендірова өзінің және жақындарының басынан өткен жантүршігерлік оқиғаларды баяндап берді. Ол аталған елге 2014 жылы Ресей-Түркия әуежайы арқылы барған, деп хабарлайды Neonomad.kz ақпарат агенттігі.

Динара Ескендірова бастапқыда интернеттен жеңіл өмір сүру үшін Сирия азаматына тұрмысқа шығу туралы көп ақпарат оқығанын жеткізді.

«Аталған елге Қазақстаннан 2014 жылдың қыркүйек айында кеттім. Алғашында ол жаққа жалғыз жол тарттым. Бірақ, алдымен, интернет арқылы ислам мемлекеттеріндегі өмір туралы көп іздедім. Көптеген адам маған жолдың ауыр екенін және жалғыз баруға болмайтынын ескертті. Ақырында Түркияға барып, ДАИШ әскерінің құрамындағы кавказ жігітпен отау құрдым. Онымен желіде танысқан болатынмын. Осылайша екі күннен кейін Сирия жеріне аяқ бастым», – дейді ол.

Екі баланың анасы атанып үлгерген Динара Ескендірованың күйеуі соғыс аумағында жүріп көз жұмады. Осыдан кейін ол өмірінің бұрынғысынан бетер нашарлап кеткенін айтады.

«Жесір қалған соң, көптеген қиындықты басымнан өткердім. Нағыз ислам мемлекетінің қандай болатынын білдім. Маған қатысты әділетсіздіктер көп болды. «Макар» деп аталатын үйде 15-ке жуық әйел бірге тұрдық. Қыз-қырқын көп жерде ұрыс-керіс те көп. Бізді, тіпті, қамап қойып ешқайда шығармайтын еді. Базарға көлікпен апарып, алып келетін. «Еркін болғым келеді» десең, «Күйеуге шық» дейді. Амалсыз тағы бір мәрте күйеуге шықтым. Сондай-ақ, аталған елде әйел қауымына интернетке кіруге тыйым салынған, тек ер азаматтар кіреді», – деді ол.

Әрі қарай Динара Ескендірова ересек жандар ғана емес, кішкене бүлдіршіндердің де аяусыз зорлық көретінін айтады. Мысалы, ұлдарға арналған мектептерде подофильдер мен гомосексуалистер көп.

«Бірде құрбымның «Муаска» деп аталатын мектепте оқитын 6 жастағы інісі 15 жастағы әпкесіне сондағы сұмдық жағдай туралы айтып келді. Әбден ашынған бала бір күні жылап келіп, өзін үйдің шатырында ересектердің зорлағанын айтты. Құрбым оларды жазалатуға тырысқанымен, бірінің жасы – 12, екіншісінің жасы -14-те болғандықтан, оларға тек дүре соғылды. Ол жақта балалардың гомосексуализмге әбден бойлары үйреніп қалған», – деді ол.

Осы орайда келіншек қазақстандықтарға абай болуға кеңес берді.