Коронавирусқа қатысты Шығыс Қазақстан облысында ҚХР Синьцзян-Ұйғыр автономиялық ауданымен шекара жабылды, деп хабарлайды Neonomad.kz ақпарат агенттігі 24.kz сайтына сілтеме жасап.
Кеден бекеттерінде бақылау күшейтілді. Осыған дейін өңірге келген шетелдіктер тепловизорлар арқылы тексеруден өтті. Облыстың шекаралас Зайсан және Үржар аудандарында медициналық қызметкерлерге қосымша нұсқаулық өткізілді. Эпидемиологтар вирусқа қарсы оқу-жаттығуларға дайындалып жатыр. Өткен айдың өзінде Қазақстан мен Қытайдың үш мыңнан аса азаматы шекарадан өткен.
Тоқаев Қытайда пайда болған коронавирустың таралуына жол бермеу жөнінде нақты тапсырма берді «Жолаушылар мен тасымалдаушылар арасында күдікті жағдайлар тіркелген жағдайда әрекет ету алгоритмі мен ақпарат схемасы бар. Шекара бекеттерінде келген адамдардың дене қызуын өлшейтін тепловизорлар бар», – деді ШҚО бойынша ҚР ДСМ тауарлар мен қызметтердің сапасы мен қауіпсіздігін бақылау департаментінің бөлім басшысының міндетін атқарушы Әлия Оспанова.
