Астаналық әкімдік көпбалалы аналар қатысқан кешегі митингіге қатысты пікір білдірді. Олардың сөзінше, біразы баспана алуға кезекке тұрмай жатып, үй талап ететін аналар екен, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап. 

Нұр-Сұлтан әкімдігі қоғамдық даму басқармасының бастығы Талғат Рахманбердінің айтуынша, заңсыз митингіге қатысатындардың басты талабы – баспана мәселесі. Тіпті елорда басшылығының қабылдауларында болған адамдар да осы талапты қойған.

«Көптеген әйел тіпті баспана алуға кезекке тұрмай жатып, тұрғын үй мәселесін шешуді талап етеді. Біз баспана қатаң түрде заң аясында берілетінін айтқымыз келеді. Заң бар, қолданыстағы нормалар бар. Бірінші негізгі талап – баспанаға мұқтаж ретінде кезекке тұру керек. Сондықтан пикеттерге, митингілерге шығып, баспана талап ету толығымен заңсыз», – деп хабарлады журналистерге басқарма басшысы.

Талғат Рахманберді Қазақстан аумағында бейбіт митингілер, жиындар, шерулер, пикеттер мен демонстрациялар ұйымдастыру және өткізу тәртібі туралы заңға сәйкес, акция өткізгісі келетіндер қала әкімдігіне өтініш беруі керек екенін еске салды.

Еске сала кетейік, 19 қыркүйекте таңертеңгі сағат 11.00 шамасында Нұр-Сұлтанда бір топ әйел Ақорда маңына жиналып, биліктен әлеуметтік мәселелерін шешіп беруді талап еткенін жазған болатынбыз.