Ақмола облысында 16 жастағы көкшетаулық қыз із-түссіз жоғалып кетті, деп хабарлайды Neonomad.kz ақпараттық агенттігі.
Көкшетауда колледждердің бірінде 1-курста оқитын он алты жастағы Расула Жанашаева 8 қараша күні Зеренді ауылында тұратын әкесіне қонаққа кеткен көрінеді. Қыздың анасының сөзінше, ол ауылға жетпеген. Осы уақытқа дейін байланысқа шығып отырған. Алайда оның жоғалғаны туралы ақпарат 13 қарашада Көкшетау қаласының полиция басқармасына түскен.
«Соңғы рет әйел қызымен 12 қарашада сөйлескен, алайда 16:00-ден кейін кәмелетке толмаған қыздың телефоны сөндірілген. Қыздың құрбысының айтуынша, Расула өздігінен елордаға кетіп қалуы мүмкін. Алаңдаған ана полицияның көмегіне жүгінген.
Қазіргі уақытта полицейлер жоғалған қыздың туыстары мен таныстарынан, достарынан, көршілерінен сұрау алып жатыр. Арнайы топтар Ақмола облысының көрші аудандары мен Нұр-Сұлтан қаласында іздеп жатыр», – делінген ПД хабарламасында.
Расула Жанашеваның бойы – 160-165 сантиметр, орташа денелі, шашы қара түсті. Тісінде брекет бар, оң алақанында татуировкасы бар. Үстінде ақ күртеше киген, қара түсті водолазка және қара түсті джинсы киген. Полицейлер Расула Жанашеваны көрген не білген адамдар оны табуға септігін тигізетін кез келген ақпаратты хабарлауды сұрайды.
