Ташкенттің Юнусабад ауданында 55 жастағы ер адам карантинге қарамастан қызын ұзатқан. Ұзату тойына туысқандары, достары мен көршілері қатысқан, деп хабарлайды Neonomad.kz ақпарат агенттігі.
Өзбекстан ІІМ-нің хабарлауынша, бұл оқиға бойынша Қылмыстық кодекстің «Эпидемия кезінде санитарлық талаптарды бұзу» бабына сәйкес іс қозғалған. Бұл бап бойынша айыпты деп танылған адамға 2300 АҚШ долларына дейін айыппұл салынады не болмаса бес жылға дейін бас бостандығынан айырылуы мүмкін.
Осымен Өзбекстан астанасында карантин жарияланғанына қарамастан той өткізген екінші оқиға тіркелді. 27 наурызда көп қабатты тұрғын үйлердің бірінің ауласына үйлену тойын өткізбек болған. Той болған жоқ, себебі тұрғындардың бірі полицияға шағым түсірген. Карантинді бұзушыға 100 доллар көлемінде айыппұл салынды.
Өзбекстанда карантин 16 наурыздан бастап енгізілді. 31 наурыздағы мәлімет бойынша, бұл елде коронавирус жұқтырғандардың саны 158-ге жетті. 7 адам жазылып шыққан. Екеуі қайтыс болды.
