Білім министрі көпбалалы аналарға арналған квота кімдерге берілетінін және қалай алуға болатынын айтты, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап.
Асхат Аймағамбетовтың сөзінше, оқуға түсемін деген көпбалалы аналарға квота беріле бастаған.
«Мысалы, көпбалалы ана оқуға түсемін, грант аламын десе, құжаттарын тапсырады. Сол адамдарға арналған квота болады. Квотаның ішінде олар орынды жеңілдікпен алады. Бірақ оны алу үшін де ұлттық бірыңғай тестілеуді тапсыру керек. Ол – бір. Екіншіден, шекті балды жинау керек. Сонда ғана квотаға тапсыруға болады. Дегенмен, квотаға тапсырған адамдар да өзара бәсекеге түсіп, грант үшін таласады», – деді Аймағамбетов Sputnik Қазақстан тілшісіне берген сұхбатында.
Министрдің мәліметінше, әзірше квотаған сұраныс аз.
«Енді, бүгінде бұл квотаға үлкен сұраныс жоқ. Бірақ көпбалалы аналармен кездескенде осындай ұсыныстар түскен. Жалпы, қазір көпбалалы аналарды жұмысқа тартуымыз керек, оларға білім беруіміз керек деп айтып жатырмыз ғой. Сондықтан осы тұрғыда көпбалалы аналар оқимыз десе, біз ондай мүмкіндік беруге дайынбыз», – деп атап көрсетті Аймағамбетов.
Еске сала кетсек, Министрлік халықтың әлеуметтік осал топтарын қолдау мақсатында көпбалалы, толық емес, мүгедек балаларды тәрбиелеп отырған отбасылар, «Алтын алқа», «Күміс алқамен» марапатталған аналар үшін білім грантын беру бойынша квота бөлетінін айтқан болатын.
