АҚШ-та дәмханаға келушілер күн сайын жұмысқа барып-келу үшін бес сағат жаяу жүруге мәжбүр болған даяшыға автокөлік сыйлады, деп хабарлайды Neonomad..kz ақпарат агенттігі Sputnik Қазақстан басылымына сілтеме жасап.
Оқиға Галвестон қаласында (Техас штаты) болды. Адрианна Эдвардс күн сайын бес сағат уақытын жолға кетіріп, 22,5 шақырым жаяу жүрген. Қыз көлікке ақша жинай бастапты, бірақ жалақысы тамақтан, басқа да шығындардан артылмаған.
26 қараша күні таңертең Адрианна ерлі-зайыптыға таңғы ас әкеліп берген. Клиенттер даяшының жұмысқа келіп-кету үшін ұзақ жол жүретінін кездейсоқ біліп қалады, содан олар дәмханадан шығып кетіп, бірнеше сағаттан кейін тосынсыймен – 2011 жылғы Nissan Sentra автокөлігімен қайтып келді.
Басында қыз бұл әзіл деп ойлаған, бірақ ерлі-зайыпты оның күмәнін сейілтті. Енді Эдвардс жолда жарты сағат қана жүреді, сонымен қатар колледждегі оқуын ертерек бастай алады. Ол болған жағдайға әлі де сенбей жүргенін және әр екі сағат сайын шынымен де өз көлігі бар екеніне көз жеткізу үшін терезеден қарайтынын жасырмады.
Даяшыға қымбат сыйлық жасаған ерлі-зайыпты аты-жөнін айтқысы келмеді. Олар Адрианнадан біреуге жақсылық жасауды сұраған.
