Алакөлге құбыр арқылы сасық иісті лай су құйылып жатыр, деп хабарлайды Neonomad.kz Facebook желісінің қолданушысы Бауржан Омаровтың жазбасына сілтеме жасап. 

Автордың сөзінше, ол маусым айында ғана Алакөлде демалған екен. Алайда жариялаған видеосы 14 сағат бұрын түсіріліп, жүктелген.

«Міне бұл Алакөлдегі Ақши ауылы. Міне қараңыздар, жағымсыз иісі бар су көлге төгіліп жатыр. Бұл канализацияның қалдығы. Иісі адам төзгісіз, жағымсыз. Міне көлді осылай ластап жатыр. Қаншама адам жүр», – дейді бейнежазбаны түсіріп жүрген автор.

Видеоны мұқият қарасаңыз, құбырдан көлге лас су ағып жатыр. Оның түсі де жаман көрінеді, ал сол жерде демалып жатқан адамдардың сөзінше, судың иісі канализациядағы судікіне ұқсас.

Ал Алакөл ауданының әкімдігі болса бұл «бассейннен аққан су» дейді. Мәселені тексеру үшін арнайы комиссия құрылғанын жеткізді.

«Құрметті Алакөл ауданының тұрғындары мен қонақтары! Бейнежазбада көрсетілген су «Көктем гранд» демалыс орнының бассейнінен аққан су екенін хабарлаймыз. Көлге ешқандай зияны жоқ. Аудан әкімдігінің қызметкерлері тарапынан аталған жерге барып, тексеру жұмыстары жүргізілді. Өздеріңізге белгілі таралған бейнежазбада көрсетілген «Көктем Гранд» демалыс орнының бассейнінен көлге құйылып жатқан су мәселесі бойынша бүгін аудандық комиссия құрылды. Комиссия төрағасы аудан әкімінің орынбасары Айдын Чалкенов, құрамына аудандық денсаулық сақтау басқармасы, экология, тұрғын үй коммуналдық шаруашылық және тұрғын үй инспекциясы бөлімі, «Атамекен» Кәсіпкерлер палатасы және аудандық кәсіпкерлік бөлімі мамандарымен қамтылды. Бұл мәселе бойынша қосымша ақпарат беріледі», – деді Алакөл ауданы әкімінің баспасөз қызметінен.