Полицейлер Алматы облысында жоғалып кеткен қызды қаладағы «Арбаттан» тапты, деп хабарлайды Neonomad.kz ақпарат агенттігі қалалық полиция департаментіне сілтеме жасап.

Алматы қаласы Алмалы ауданы ювеналді полиция департаментінің қызметкерлері демалыс күні жоғалған 13 жасар қызды тапты.

«Алматы облысының кішкене тұрғыны Алматы қаласындағы Арбаттан табылды. Қыз баланың айтуынша, ол анасымен бірге тұрғысы келмейді. Үйден өз еркімен кетіп қалған. Ол бұрын да үйінен бірнеше рет кетіп қалғанын айтады. Бірақ әрдайым үйіне қайтып келіп отырған», – делінген полиция хабаралмасында.

Сондай-ақ, хабарламада қыздың үйден өгей әкесіне бола кеткені айтылған. Ол бір шаңырақ астында тұрып жатқан өгей әкесімен сыйыса алмаған екен.

«Әйел адам инспекторларға қызы және екінші күйеуімен бірге бір үйде тұратынын айтты. Алайда қызға өгей әкесінің бұйрық беріп сөйлегені ұнамайды екен. Яғни қыз бала өгей әкесінің ұсынған талаптарына көнгісі келмейді. Кетуіне осы нәрсе себеп болса керек. Түсіндіру жұмыстары жүргізіліп, қыз бала анасына табысталды», – деді Алматы қаласы полиция қызметкері Ләйлә Әліпбаева.

Естеріңізге сала кетсек, Алматы облысында із-түссіз ғайып болған мақау отбасының табылғаны туралы хабарлаған едік.