Ташкент милициясы өзін геймін деп ашық айтқаны үшін оны жауыздықпен өлтірген екі күдіктінің ұсталғанын мәлімдеді, деп хабарлайды Neonomad.kz ақпарат агенттігі.
Самарқанд облысы Челак қаласының тумасы 25 жастағы Шокир Шавкатовты өлтірді деген күдікпен 40 жас шамасындағы екі күдікті ұсталған. Аты-жөнін жасырған Юнусабад аудандық прокуратура қызметкері Шокир Шавкатовтың өліміне байланысты «Қасақана адам өлтіру» бабы бойынша қылмыстық іс қозғалғанын мәлімдеді.
Оқиға 12 қыркүйекте болған. Жас жігіт ЛГБТ өкілдерінің клубында отырған кезде екі ер адам оны сыртқа алып шығып, алдын ала мәлімет бойынша, пәтерге апарған. Әуелі ұрып-соққан, кейіннен өлтірген. Бұл ақпаратты полицияға Шавкатовтың досы баяндаған.
Екі күн бұрын полиция аталған түнгі клубқа басып кіріп, шамамен оннан астам гей жігітті ұстаған еді. Ал Шавкатовқа барған екі ер адам өзін полиция қызметкерлері ретінде таныстырған. Шавкатовтың досы оны жыныстық азшылық өкіліне жатқаны үшін өлтірді деп санайды.
Өзбекстан мен Түркіменстанда жыныстық азшылық өкілдері сексуалдық ориентациясына бола қысым көріп, қылмыстық жауапқа тартылады.
2018 жылы мамыр айында Өзбекстан БҰҰ-ның адам құқығы бойынша 11 ұсынысын қабылдамай қойған. Олардың арасында ЛГБТ өкілдерінің құқығы жайлы пунктер де бар. Өзбекстандағы адам құқығы жөніндегі ұлттық орталықтың директоры Акмаль Саидовтың айтуынша, БҰҰ ұсыныстары республиканың қылмыстық кодексінің 120-бабына қайшы келгендіктен билік оларды қабылдамаған.
Естеріңізге сала кетсек, бір күн бұрын гей екенін мойындаған жас жігітті өлтіріп кеткені туралы хабарлаған едік.
