Алматылық «Қайрат» Еуропа лигасының алғашқы кезеңінде Босния және Герцеговина елінің «Широки Бриег» командасымен кездеседі, Neonomad.kz хабарлайды.
Алғашқы кездесу 11 шілде күні Алматының орталық стадионында өтсе, қарымта матч 18 шілдеде сырт алаңда өтеді.
Егер бұл кездесуде жеңіске жетсе, екінші кезеңде «Лачи» (Албания) — «Хапоэль» (Беэр-Шева, Израиль) жұбының жеңімпазымен жолығады.
«Қайратқа» қарсы ойнайтын босниялық «Широки Бриег» командасы қазақстандық жанкүйерлерге жақсы таныс. Команда 1948 жылы құрылған. 2004 жылы алғаш рет ел біріншілігінде топ жарған. Сондай-ақ, араға екі жыл салып, сол жетістігін қайталаған. Бұл жеңісінен басқа ел Кубогын екі мәрте жеңіп, бірнеше жыл қатарынан чемпионатта жүлдегерлер қатарынан көрінді.
«Широки Бриег» қазақстандық футбол клубтарымен бұған дейін екі рет кездескен. Алғаш рет 2013-14 жылғы маусымда павлодарлық «Ертісті» Еуропа лигасының екінші іріктеу кезеңінде жарыс жолынан шығарса, араға екі жыл салып шымкенттік «Ордабасымен» ойнаған. «Ордабасымен» болған жүздесу де босниялық футболшылардың пайдасынан шешілді.
Айта кетейік, еурододада ел намысын қорғайтын өзге де командалардың қарсыласы белгілі болды. Чемпиондар лигасының алғашқы кезеңінде «Астана» румыниялық ЧФР-мен ойнайды. Алғашқы ойын 9 не 10 шілдеде Нұр-Сұлтанда, қарымта ойын 16 не 17 шілдеде Клужа қаласында өтеді.
Шымкенттік «Ордабасы» Еуропа лигасының бірінші кезеңінде Грузияның «Торпедосына» қарсылас атанды. Алғашқы кезеңнен өтсе «Младо Болеслав» (Чехия) командасымен күш сынасады.
Ал, «Тобылдың» алғашқы қарсыласы – Люксембургтың «Женесс» командасы. Қостанайлықтар бұл кездесуден сүрінбей өтсе, португалиялық «Виктория» клубына қарсылас атанады.
