Алматыда ер адам «көтер» деп жылай берген баласын ұрып өлтірген. Қатыгез әкеге қатысты сот үкімі шықты, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.
«Алматы қаласының қылмыстық істер жөніндегі ауданаралық мамандандырылған соты ер адамды ҚР Қылмыстық кодексінің 99-бабы 2-бөлігі 3-тармағы («Кінәлі адамға дәрменсiз күйде екенi көрінеу белгiлi адамды, сол сияқты адамды ұрлаумен не кепілге алумен ұштасқан кісі өлтіру») бойынша кінәлі деп тапты. Оны 18 жылға бас бостандығынан айырып, қауіпсіздігі қатаң қылмыстық-атқару жүйесі мекемесінде жазасын өтейтін болады», – деді Алматы қалалық сотының баспасөз қызметі.
Еске сала кетсек, оқиға 23 қыркүйекте болған. Сол күні сәби өгей әкесінің қарауында болған. Ер адам жеті немесе сегіз литр сыра ішіп, содан кейін баламен бірге шаштаразға барған. Сол кезде кішкентай бала көтеруін сұраған. Осы әрекеті үшін өгей әкесі баланың басынан соққы жасаған. Сәби асфальтқа құлап, тағы да соққы алып, қатты жылай бастаған. Сонда өгей әкесі оның ішінен ұрған. Бала есінен танып қалған. Кездейсоқ өтіп бара жатқан адам жедел жәрдем шақырған.
Ауруханаға жеткізілген бала комаға түсіп, оған бас сүйегінің трепанациясын жасауға тура келген. Өкінішке орай, 3 қазанда бала қайтыс болды.
Қаза тапқан баланың өгей әкесін қылмысын мойындады.
«Ол өмір бойы түрмеде отырса да, бостандыққа шықса да, менің ұлым қайтып келмейді. Құдай жазасын береді. Қандай шешім шықса да маған бәрібір», – деді қайтыс болған баланың анасы Әсел Теңізбаев.
