Қазақстандық әйел ақша тапшылығынан дәрігерге қарала алмай отырғанын айтты. Бүгінде ол 15 жастағы қызының көмегіне зәру, деп хабарлайды Neonomad.kz ақпарат агенттігі КТК арнасының «Астарлы ақиқат» бағдарламасына сілтеме жасап.

Алғаш тұрмысқа шыққанда салмағы 50 кг болған Шынар бүгінде ең толық әйелдердің қатарын толықтырып отыр. Уайымға салынған Шынар Айбасова тағы да 50 кг салмақ қосып алған. Жас кезінде оны алып қашып үйленген жұбайы семіздігінен жиіркеніп, үйден кетіп қалған.

Бүгінде жалғызбасты ана 15 жастағы қызымен пәтер жалдап тұрады. Тұңғыш ұлы вахталық жұмыс істейді. Ал екінші баласы бұзақылық жасау бабы бойынша 5,5 жылға сотталған.
Шынар Айбасова ауруханаға қарала алмайды. Себебі қолында құжаты жоқ. Сондай-ақ, бұған артық ақшасының жоқтығы кедергі. Ал күйеуі сол кеткеннен мол кеткен.

«Өтімді алып тастағаннан кейін біртіндеп тола бастадым. Денем емес, қарным тола бастады. Салбырап икемге келмей кетті. Оның ішінде не бар екенін де білмеймін. Күйеуім соны бетіме басып, кетіп қалды. «Еркек сияқтысың» дейтін», – дейді әйел.

Бұдан өзге ол күйеуінің көзіне шөп салып, бұрынғысынан бетер уайымға салғанын бөлісті.