Маңғыстау облысында оқу-жаттығу кезінде граната жарылып, сарбаз ауруханаға түсті. Дәрігерлер бір көзін алып, қолын кесуге мәжбүр болды, деп хабарлайды Neonomad.kz ақпарат агенттігі инАктау басылымына сілтеме жасап.

Қайғылы жағдай 17 шілде күні Маңғыстау облысының Бейнеу ауылындағы полигонда болған. № 99116 әскери бөлімнің қызметкері Сергей Кошелев оқу-жаттығу кезінде граната жарылып, ауыр жарақаттар алды. Мұны аталған өңірдің денсаулық сақтау басқармасындағылар да растады.

«Дәрігерлер шұғыл түрде көмек көрсетіп, оның өмірін аман алып қалды. Дәл қазір ол травматология бөлімінде жатыр. Өміріне еш қауіп төніп тұрған жоқ. Дүйсенбі күні емін әрі қарай жалғастыруы үшін Нұр-Сұлтанға жеткізілетін болады», – деді денсаулық сақтау басқармасындағылар.

Алайда туыстары оның бұдан да ертерек жеткізілуі керектігін айтып отыр. Себебі осы күнде бір көзінен айырылып, дәрігерлер қолын кескен. Сондай-ақ, қазір екінші көзін аман алып қалу мәселесі тұр.

Енді ер азаматтың туыстары денсаулық сақтау министрлігіне хабарласып, Маңғыстауға борт жіберуді өтінбек.

Сурет: war-time.ru