Тамыз конференциясында Білім және ғылым министрі енді балалар екі жастан бастап балабақшаға бара алатынын айтты, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.
«Жаңа бағдарламаларға көшіп жатырмыз. Жас ерекшелігіне байланысты өзгерістер болады. Балаларды балабақшаға екі жастан бастап қабылдау маңызды», – деді министр Нұр-Сұлтанда өткен Тамыз конференциясы барысында.
Сонымен қатар, министр балабақшалардың жұмысын тамызға дейін ұзарту туралы ойын айтты.
«Бүгінде балабақшалар үш жастан алты жасқа дейінгі балаларды қабылдайды. Бірақ балалардың көбі 6 жасқа тола салысымен мектепке барып жатыр. Сондықтан балаларды екі жастан бастап балабақшаға қабылдау мәселесін көтеріп отырмыз. Сонымен қатар, балабақшаның жұмысын тамызға дейін ұзарту керек. Осыған байланысты арнайы бағдарлама әзірлеп жатырмыз», – деді министр.
Еске сала кетсек, кеше Нұр-Сұлтанда Тоқаевтың қатысуымен Тамыз конференциясы болды. Онда президент мұғалімдердің жалақысын екі есеге арттыруды тапсырды.
