Енді сыртқы экономикалық қызмет қатысушылары кедендік декларацияны электронды форматта ұсына алады. Яғни, кеден органына тиісті құжат көрсетпей-ақ, онлайн нұсқада атқару мүмкіндігі қарастырылған. Бұл туралы Қазақстан Республикасы Қаржы министрлігінің баспасөз қызметі хабарлады.
2018 жылдан бері елімізде «АСТАНА-1» ақпараттық жүйесін қолдану арқылы электронды декларациялау жүзеге асып келеді. Ол «жасыл дәліз» принципін қолдануға ықпал етіп, нәтижесінде кедендік декларация ресми тұлғаның қатысуынсыз автоматты түрде орындалатын болды.
«Мұндай жаңашылдық уақыт үнемдеуге және қаржылық кедергілерді азайтуға айтарлықтай үлес қосты. «Жасыл дәліз» арқылы шығарылым уақыты кем дегенде 1 минутта алады. Қазіргі таңда импорттың 65 пайызы, экспорттың 92 пайызы «жасыл дәліз» арқылы декларацияланған», – дейді ҚР Қаржы министрлігінің Мемлекеттік кірістер комитеті төрағасы орынбасары Өмірзақ Бейісбеков.
Сонымен қатар, «АСТАНА-1» және «электронды шот-фактура» ақпараттық жүйелері біріктіріліп, елімізге келетін тауарларды бақылап отыруға мүмкіндік туды. Ал «виртуалды қойма» модулі болса, кедендік декларациялардан ақпарат алу кезінде виртуалды тегтер арқылы тауарлардың бүкіл бизнес-процесін автоматты түрде бақылап отыруға жағдай жасайды.
«Сыртқы экономикалық қызмет қатысушыларына техникалық қолдау көрсету мақсатында комитетте арнайы қолдау қызметі мен Telegram мессенджерінде чат ашылды. Оған ҚР Қаржы министрлігі, Мемлекеттік кірістер комитеті қызметкерлері мен басшылығы қосылды. Күн сайын чатқа 50-ден астам өтініш келіп түседі. Оның басым бөлігі тауарларға декларация толтыру мен жүйеде жұмыс істеу тәртібіне байланысты. Әр хабарлама 5 минутта өңделеді», – делінген министрлік хабарламасында.
Жоспарға сәйкес, осы жылдың соңына дейін ҚР Үкіметі қаулысын қабылдап, тиісті шаралар қолға алынбақ. Нақтырақ айтсақ, кедендік рәсімдеу кезінде шартты шығаруға тыйым салынған өнімдердің, яғни, балалар мен жасөспірімдерге арналған жеңіл өнеркәсіп өнімдері, жиһаз бұйымдары, құрылыс материалдары мен көлік құралдарының жекелеген түрлері және т.б. айтарлықтай кеңейтілетін болады.
«Сыртқы экономикалық қызмет қатысушылардың қолында техникалық регламент талабының сәйкестігін растайтын қажетті құжат болмаса, тауар шығару мүмкіндігінен айырылады», – деп атап өтті Өмірзақ Бейісбеков.
