Ішкі істер министрі қол астындағыларға алаяқтық жолмен ақша алып, ізін суытып кеткен деканды табу үшін екі күн берді, деп хабарлайды Neonomad.kz Sputnik Қазақстан сайтына сілтеме жасап.
Nur Otan партиясында өткен қоғамдық қабылдауда министр Ерлан Тұрғымбаев Жамбыл облысындағы әріптестеріне қашқын деканды табуға екі күн берді. Белгілі болғандай, университеттің деканы алдап ақша алғаны үшін оның үстінен Гүлзина Мұсаева есімді астаналық арыз жазады.
Мұсаеваның сөзінше, университетке төлеу керек болған ақшаны декан өз карточкасына аударуды талап етіп отырған.
Арызды оқып шыққан министр бейнебайланыс арқылы Жамбыл облыстық ішкі істер департаментінің басшылығынан Ақтаевтың неге ұсталмай жатқанын сұрады.
«Мұсаеваның арызы бойынша неге шара қабылдамайсыздар? Университеттің білдей факультет деканы ақшаны алып, тығылып жүр. Оны қалай ұстай алмай жүрсіздер? Осыны түсінбей отырмын», – деді Тұрғымбаев.
Департамент басшысының міндетін атқарушы Бауыржан Үдергеновтың айтуынша, қылмыстық іс қозғалған. Бірақ декан үйінен табылмай жатқанын жеткізді. Ал ұялы телефоны болса Алматы облысында жүргенін көрсетіп тұр екен. Министр алаяқ деканды екі күн ішінде құрықтауды тапсырды.
«Екі күннің ішінде маған оны тауып беріңдер. Сіздерде барлық техникалық мүмкіндік бар. Ол құжатсыз жүрген киллер емес қой. Азаматтық тұлға, бұрын сотталмаған. Ресми жұмыс істейді. Ондай адамды табу қиын емес. Екі күн беремін. Табыңдар да, ақшаны кімге және қалай аударғанын анықтаңдар. Ол ақшаны иемденіп кетсе, алаяқтық бойынша іс қозғаңдар да, жазаға тартыңдар», – деп Тұрғымбаев сөзін түйіндеді.
