Қылмыстық іске қатысты сот жабық режімде өтті. Бірақ журналистер сот үкіміне қатыса алды. Іске қатысты болған Жаңасыл Жұбатов 15 жылға, ал Әлиев болса 13 жылға бас бостандығынан айырылды, деп хабарлайды Neonomad.kz «Диапазон» газетінің сайтына сілтеме жасап. 

Тергеудің мәліметінше, Жаңасыл Жұбатов пен Әлібек Әлиев теріс діннің ізін қуғандар, олар ДАИШ* идеологиясын қолдаушылар болған екен.

Ақтөбеде сотталғандар «күнәхарларға» қарсы лаңкестік әрекетті насихаттайтын видеолар көрсетіп жүрген. Жұбатов болса «Паллада» дүкеніне барып, Макаров пен аңшылыққа арналған қаруларына оқ-дәрілерін сатуды сұраған. Қылмыстың істің материалдарына қарағанда, олар әкімдің 100-ге жуық қызметкерін қала сыртына шығарып, оларды өлтіргісі келген.

Жұбатов жаман ойын жүзеге асыру үшін әкімдікке өз адамын жұмысқа орналастырғысы келген. Сөйтіп сол адам арқылы қызметкерлер қашан келіп, қашан кететіні туралы ақпарат алып отыруды көздеген. Сондай-ақ олар экстремизге қатысты істі қараған судьяны өлтіруді жоспарлаған. Ал оның ақшасын болса ДАИШ* террористерінің жолына жұмсамақ болған.

Жұбатов пен Әлиев «күнәхарларға қарсы қарулы джихадқа кіруге насихаттаған. Тіпті бұрын Отарда қызмет еткен бір танысына 3 млн теңгеге қару, граната және тағы басқа жарылғыш заттарды алып беруді сұраған. Сөйтіп ұлттық қауіпсіздік комитетінің департаментін жарып жүберуді жоспарлапты. Айыптаушылардың мәліметінше, тонау мен қарақшылық арқылы мемлекеттік қызметте істейтіндердің мүлігін иелеп алуды көздеген.

Сотта екеуі де терроризмді насихаттау, араздық тудыру, террористік топтарға қатысы бар деген айыптарды мойындамады.

«Үйден болттар, сомын, атауыз, силикон, дәнекерлеуші құрал, сымдар салынған бір қорапты алып шықты. Кез келген еркектің үйінде құрылысқа арналған заттар болады. Мен жуырда ғана үйде жөндеу жұмыстарын аяқтадым. Ал олар болса мені жарылғыш заттарға қатысы бар заттарды сақтадың деп айыптауда», – деді Әлібек Әлиев сотта.

Үкім шығарылған соң сотталғандардың аналары журналистерге сұқбат берді. Олардың сөзінше, ұлдарына қысым көрсетілген, істі қолдан жасаған.

«Ұлымды моральді түрде құртты. Ешқандай қылмыстық іске қатысы жоқ, барлығы өтірік. Оны күндіз сағат 12.00 кезінде ұстады, түнге дейін ұрып-соқты. Тергеу сотына әрең жетті, аяғынан ұрған. Ұлым оны жіберетін шығар деп ойлаған, алайда бес түрлі бапты мойнына ілді. Оның үш баласы бар, өз отбасын жақсы көретін адам. Ондай іске ешқашан бармас еді», – дейді Жаңасыл Жұбатовтың анасы.

Сотталған Әлібек Әлиевтің болса бес баласы бар екен. Олардың бірі сал ауруына шалдыққан. Оның да анасы қылмыстық іс қолдан жасалып отыр деген пікірде.

«Әкімдіктің жүздеген қызметкерін қала сыртына алып шығуды жоспарлаған деген айып тағуда. Екі адам ондай істі қалай жасайды? Оны жүзеге асыру үшін әскери топ керек, қаншама ақша қажет. Мойындамаса, әйелін бес жылға қамаймыз, ал балаларды болса жетімдер үйіне жібереміз деген. Ұлымның айтуынша, қандай құжаттарға қол қойғанын білмейді екен», – дейді Әлиевтің анасы.

Сотталғандардың туыстары аппеляцияға шағым түсіретінін айтты.