Павлодар облысында қайырымдылық аукцион өтті. Онда облыс әкімі Болат Бақауовтың портреті 31 млн теңгеге сатылды, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.
Бүгін әлеуметтік желіде Павлодар облысының әкімі Болат Бақауовтың портреті қайырымдылық аукционында сатылғаны туралы видео тарады. Белгілі болғандай, іс-шараны белгілі КВН-шілер Тұрсынбек Қабатов пен Ярослав Мелехин жүргізіп, бір лот – әкім Болат Бақауовтың портретіне сауда-саттық өткізеді. Сауда-бағаны көтеру тәсілімен өткен.
Бұдан кейін желіде тағы бір видео жарияланды. Бейнеден білуімізше, портретті қалалық мәслихаттың депутаты Гнел Акопянға ұқсайтын адам сатып алған. Басылымның мәліметінше, депутат Бақауовтың суретін 31 млн теңгеге сатып алғанын растады.
«Картинаны мен сатып алдым. Бұл қаражат мүгедектерге көмек ретінде жұмсалады. Оның кімнің портреті екені қаншалықты маңызды», – дейді Гнел Акопян.
Қалалық мәслихаттың депутаты Павлодар облысында жол жөндеу компаниясының директоры екен.
Айта кетсек, облыстық әкімдіктегілер қайырымдылық балы 25 желтоқсанда өткенін айтты. Аймақ әкімінің баспасөз хатшысы Ернар Сейтахмет аукционның осы іс-шара аясында ұйымдастырылғанын атап өтті.
«Лоттарды суретшілер ұсынады. 20-ға жуық сурет, «Ертіс» командасының қолтаңбасы бар футбол добы, ағаштан жасалған шоқпар. Жалпы сомасы 52,2 миллион теңге, оның ішінде 30 миллион теңгесі картиналар үшін», – деді аймақ әкімінің баспасөз хатшысы Ернар Сейтахмет.
