Жанар Толыбаева наурызда босануына байланысты Алматы сотының шешімімен басқа жерге ауыстырылған болатын. Енді ол өзінің бұрынғы орнына қайтарылды, деп хабарлайды Neonomad.kz.
Денис Теннің өліміне қатысы бар деп сотталған Жанар Толыбаева қауіпсіздігі орташа колонияға қайтарылды. Белгілі болғандай, 2019 жылдың наурызында Толыбаева ұл босанды. Соған байланысты Алматы сотының шешімімен қауіпсіздігі орташа деңгейдегі колониядан қауіпсіздігі төмен колонияға ауыстырылған болатын.
Енді, Қазақстан Жоғарғы сотының кассациялық алқасы сотталушы Жанар Толыбаеваны қауіпсіздігі орташа колонияға қайтаруды сұраған бас прокурордың талабын қанағаттандырды.
Үстіміздегі жылдың 6 наурызында Толыбаева ұл босанды. Оның сөзінше, сәбидің әкесі Арман Құдайбергенов. Қазір екеуі де Денис Теннің өліміне қатысты іс бойынша түрмеде мерзімдерін өтеуде.
Еске сала кетсек, 2018 жылдың 19 шілдесінде Қазақстандық мәнерлеп сырғанаушы Денис Тен бұзақылардың қолынан өлген болатын. Көлігінің айнасын ұрлап жатқан бұзақыларды тоқтатпақ болған 25 жастағы спортшы олармен сөзге келісіп қалып, арты төбелеске айналған. Сол кезде ұрылар Денистің сан тұсынан пышақпен жарақаттап, салдарынан әлемге танымал спортшы көз жұмды.
