Қазақстандық шенеуніктер мен топ-менеджерлер коронавирус пандемиясының ауыр кезеңінде өз халқының қасіретінің арқасында байып қалуға тырысып жатты. Бұл туралы жемқорлыққа қарсы агенттіктің басшысы Алик Шпекбаев мәлімдеді.
«2020 жыл адамзат тарихындағы ең ауыр жылдардың бірі болды. Бұрын-соңды болмаған стресс-тестті бүкіл әлем бойынша Мемлекеттік аппараттар өтіп, азаматтардың сенім деңгейінің кең көлемде төмендеуіне тап болды. Пандемия жағдайында, билік өкілеттіктеріне ие адамдарға үміт артқан кезде, жеке ұстанымсыз шенеуніктер мен топ-менеджерлер заңнан да,
Құдайдан да қорықпай, өз лауазымдарын жоғары табысты жеке бизнес ретінде қабылдады, бюджет қаражатын жымқырып, жүйелі түрде пара алды. Өз халқыңның қасіретімен баю сатқындық пен кісі өлтірумен тең», — деді Сыбайлас жемқорлыққа қарсы іс-қимыл агенттігінің төрағасы Алик Шпекбаев 2020 жылдың қорытындысы бойынша есеп беру алқасында.
Оның айтуынша, сыбайлас жемқорлыққа қарсы қызмет 100 қылмыстық істі тіркеді, оның 50-і — Дағдарысқа қарсы шараларға бөлінген қаражатты ұрлау.
Сонымен қатар, Шпекбаев атап өткендей, құны 2 млрд теңгеден асатын 132 ӨЖЖ аппаратын сатып алу фактілерінің жолы кесілді.
Сондай-ақ, Президенттің тапсырмасы бойынша еліміздің барлық өңірінде волонтерлер мен қоғамшылдардан арнайы топтар құрылды. Олар 10 мың дәріхананы, ауруханаларды, емханалар мен медициналық қоймаларды қамти отырып, бір жарым мың мониторингтік іс-шара өткізді.
«Қысқа мерзімде біз «СК-Фармация» мен медициналық сақтандыру қорының қызметіндегі сыбайлас жемқорлық тәуекелдеріне мұқият талдау жүргіздік, соның арқасында осы ұйымдардың ішкі бизнес-процестері барынша транспарентті және түсінікті болды. Пандемия жалғасуда, сондықтан біздің негізгі міндетіміз — коронавируспен күреске бөлінген бюджет қаражатын одан әрі толық сүйемелдеу және одан да көп азаматтарды қоғамдық бақылауға тарту», — деп толықтырды Шпекбаев.
