Соңғы бейнебаянына Бүркіт өзінің әйелін түсірмеді. Осыдан кейін тыңдармандар ол әйелімен ажырасып кетті немесе тоқал алғысы келіп жүр деп топшылаған еді. Бұл қауесеттің нүктесін әншінің өзі қойды, деп хабарлайды Neonomad.kz ақпарат агенттігі Ел аузында бағдарламасына сілтеме жасап.

«Тоқал алудан Құдай сақтасын. Ниетімнің түзу екені бір Аллаға аян. Әлеуметтік желілерде бұған қатысты маған көп сұрақ қойылады. «Тоқал алып, отбасыңыздың шырқын бұзбаңызшы» деп өтініш білдіріп жатады. Алайда қандай жағдай болмасын, мен мұндайға бармайтынымды жұрт білсе екен деймін», – деді әнші.

Әрі қарай әнші бұған бірден бір себеп ата-анасының берген тәрбиесі екенін айтты. Бүгінде ата-анасының отасқанына жарты ғасырдан ұзақ уақыт өткен екен.

«Мен сүйіктім мен балаларымды сыйлаймын. Жалпы тоқал алу деген – әр адамның өзінің қалауына байланысты дүние. Жеке өзім ата-анамнан үлгі аламын. Ал олардың бір шаңырақ астында тұрып жатқанына 60 жылдан асып барады. Сол себепті ол кісілер бізге әрдайым үлгі. Мен ешуақытта екінші әйел алмаймын», – деді Бүркіт.

Сөз соңында ол алдағы уақытта келіншегімен бірге түскен бейнебаяндардың көп болатынын жеткізді.