Нұр-Сұлтанда дәрігерлер қайтыс болған адамды «тірі» деп хаттама толтырған. Астаналық азамат ішкі істер министрінен көмек сұрады, деп хабарлайды Neonomad.kz ақпараттық агенттігі «Астана» телеарнасына сілтеме жасап. 

Nur Otan партиясының қоғамдық қабылдауында ішкі істер министрі Ерлан Тұрғынбаевтан көмек сұраған елорда тұрғыны Шухрат Таджиддиновтың сөзінше, қалалық аурухананың біріне асқазанына ауырып жатқызылған әжесіне дәрігерлер араша бола алмаған. Тіпті науқасты үйіне тірі күйінде жібердік деп хаттама толтырып жіберген екен. Астаналық азамат ауруханадан денесін алып шыққанын айтқан. Дәрігерлердің үстінен талай рет арыз жазғанымен еш нәтиже болмаған.

«Дәрігерлер оның медициналық картасын да өзгерткен. Онкологиялық ауру болды деп жазып қойыпты. Ондай болған емес. Медициналық сараптама жасап көрсе болады. Осы жағдай бойынша талай рет сотқа арыз жаздым. Бірақ істі жылы жауып қоя береді», – дейді Нұр-Сұлтан тұрғыны Шухрат Таджиддинов.

Телеарна мәліметінше, министр бұл жағдайды өз бақылауына алатынын айтып, қала тұрғынына қайтадан арыз жазуға кеңес берді.