Ақтөбеде қайтыс болған 5 жастағы қыздың ата-анасы дәрігерлерді жазаға тартуды талап етуде, деп хабарлайды Neonomad.kz ақпараттық агенттігі Nur.kz сайтына сілтеме жасап. 

«Алдағы уақытта мынадай оқиғалар болмаса екен. Қызымның қазасы дәрігерлердің қателігінен болды. Ол көзге көрініп тұр. Ем жүргізудің орнына бізді әр жерге сілтемелеп, асқындырып жіберді. Сол күні тек жас дәрігерлер қабылдады. «Баланы қалдырыңыздар» деп әр жерге жалындық. Олар уақытты өткізіп алды.

Балаға ешқандай құтқару әрекеті жасалған жоқ. Біз дәрігерлердің жазалануын талап етеміз. Дәрігерлер бала өмір бойына ауырған үлкен адамдай қылып айтып жатыр. Осындай жағдайға жеткізген дәрігерлер жауап берсін»,- дейді қыздың әкесі Ахметов Қажымұқан.

Дәрігерлер көмектеседі деген үмітпен қызын өз қолымен апарғанына әлі күні өкінеді.

«Бізді үш аурухананың арасына ерлілі-қарсылы сүйрегеннен басқа ешқандай медициналық көмек көрсеткен жоқ. Инфекциялық ауруханаға екі рет бардық. Қайта-қайта шақырған соң жедел жәрдем қызметінің өзі бізді тасуға қарсылық білдірді. Соңында біз аурухананың машинасына мініп кеттік.

Сол күні… Есін жинай алмай жатқан баланың қасына мені жібермеген соң үйден керек-жарақты алып келуге барайын деп жатқанмын. Жексенбі болатын. Реаниматолог келіп жақындарымды шақыруды сұрады. Мен баланың анасы екенімді және жағдайды өзіме айтуды талап еттім.

Олар «Біз қолымыздан келгеннің бәрін жасадық, баланың жүрегі тоқтап қалды» дегенде өзімді ұстай алмай жылай бердім. Мені анам келгеннен кейін ғана баланың қасына жіберді. Оның бетін жауып тастаған. Қасында шыбын ұшып жүрді. Ол инфекциялық аурухана.

Қызымның бетін ашқанымда ол салқындап, жансызданып қалған. Қараудың өзі қиын. Балам бірінші рет ауруханаға түсіп тұр.

Ол сол күні түнде су беріп жатқанымда «Мама, үйге қайтайықшы, мен ауырмаймын» деген еді. Сол сөздерін ойласам жаным ауырады. Облыстық балалар ауруханасы бірден қабылдағанда баланы құтқарып қалуға болар еді. Олар баланың әлсіз күйін көріп тұрып, ешқандай әрекет жасаған жоқ», – дейді анасы Ахметова Алмагүл.

Еске сала кетсек, Ақтөбеде ауырып түскен 5 жастағы қызды дәрігерлер бір-біріне сілтеймін деп, өлтіріп алды. Оқиға 13 қарашада болған еді. Ақтөбе облыстық Денсаулық сақтау басқармасы тәуелсіз комиссия құрып, бала өлімінің себебін анықтауға кірісті.