Таразда жүкті әйелге қасақана түсік жасатпақ болған гинекологтар жазадан құтылып жүр. Осындай шындықты жайып салған әйел, министрден көмек сұрады, деп хабарлайды Neonomad.kz ақпараттық агенттігі «Астана» телеарнасына сілтеме жасап.
Тараздық Надира Бешалиева жүктілігінің алтыншы айында гинекологтар балаға түрлі патологиялық диагноз қойыпты. Тіпті, сәбидің туылмай жатып шетінейтінін жеткізген. Бірақ Надира Бешалиева сау баланы дүниеге әкелді.
Енді ашынған ана сәбиінен айырмақ болғандарды сотқа берген. Бірақ құзырлы мекеме арнайы медициналық сараптаманы әзірлемей отыр. Бұл туралы Әділет министрінің қатысуымен өткен «Nur Otan» партиясының республикалық қоғамдық қабылдауында белгілі болды.
«Сараптаманы күткеніме 7 айдан асты. Бірақ, әлі күнге дейін сот-медициналық сараптама қорытындысын ала-алмай отырмын. Тараз, Алматы, Нұр-Сұлтан қалаларының өзінде сараптама жасата алмай жүрмін. Қанша уақыт болды күткеніме. Маған ақша да, басқа да қажет емес. Бастысы дәрігерлер заң алдында жауап берсе екен», – Надира Бешалиева, әділдік іздеген әйел.
Әйелдің жағдайын тыңдағана Марат Бекетаев көмегін ұсынды.
«Медициналық сараптама әзірлеу үшін алдымен тергеушіге жүгіну керек. Немесе, адвокаттың көмегі арқылы шыға аласыз. Біз сіздің мәселеңізді тікелей бақылауға аламыз. Қажет болса, адвокат жалдауға да көмектесеміз», – деді әділет министрі.
