Бүгіннен бастап жеке тұлғалар үшін салықтық рақымшылық туралы заң күшіне енді, деп хабарлайды Neonomad.kz.
Бұл заң қазақстандықтарға қандай мүмкіндіктер беретінін айтамыз. Егер сіздің салықтық өсімпұлыңыз болса, онда заң аясында олар кешіріледі. Бірақ ол үшін сіз алдымен салықтың қарызыңызды өтеуіңіз керек. 2019 жылдың 1 қаңтарына дейін жиналған салық өсімпұлдары кешіріледі.
Қаржы министрлігінің мәліметінше, 2019 жылдың 1 қаңтарындағы есеп бойынша 1,4 миллион жеке тұлғаның салықтық қарызы бар екен. Борышкерлердің жалпы сомасы 20,9 миллиард теңге болыпты. Соның 14,3 миллиард теңгесі салықтық қарыз болса, 6,6 миллиард теңгесі өсімпұлдар.
Салық қарызы бар адамдардың саны жағынан Шымкент қаласы көшті бастап тұр екен.
«Қарыздың басым бөлігі көлік құралдары салығына тиесілі. Одан кейін жер мен мүлік салығы келеді. Шымкент қаласында шамамен 148 мың адам салық төлемей жүр. Одан кейінгі орында Түркістан облысы – 139 мың адам, Жамбыл облысы – 116 мың адам, сондай-ақ, Нұр-Сұлтан қаласында қарыз болып қалған 114 мың адам бар», – дейді Қаржы вице-министрі Қанат Баеділов.
Алматы да көштен қалыспайды. Бірақ бұл қаланың тұрғындарының салықтық қарыздарының сомасы үлкен – 5,5 миллиард теңге. Одан кейін Нұр-Сұлтан (2 миллиард), Маңғыстау облысы (2 миллиард) және Шымкент қаласы (1,6 миллиард) тұр.
Сондай-ақ, кәсіпкерлікте жүргендер үшін де жақсы жаңалық бар. Кәсіпкер болып тіркелмесе де, салықтық қарызды жинағандар өсімпұлдан құтылады. Тек салық қарызын төлесеңіз болғаны. Аталған берешектің бәрі 2002- 2003 жылдары салық органдары жергілікті жүйеден жалпы республикалық салықтық ақпараттық жүйеге (БСАЖ) көшкенде шыққан.
Белгілі болғандай, үстіміздегі жылдың 1 қаңтарындағы есеп бойынша, санаттағы қарыздың жалпы сомасы 700 миллион теңге болған. Негізгі борыш – 400 миллион теңге, өсімпұл – 300 миллион теңге болған. Ал борышкерлердің саны болса 16 мыңға жетіпті.
«Өсімпұлды есептен шығару үшін мемлекеттік органдарға барудың қажеті жоқ. Қарыздың негізгі сомасы төленсе болды. Мемлекеттік кірістер органдары күн сайын жеке тұлғалардың есепшоттарын қарап отырады. Негізгі қарыз төленген жағдайды тиісті шешім шығарып, үш күннің ішінде өсімпұлды есептен шығарады», – дейді вице-министр Баеділов.
Баеділовтың сөзінше, салықтық рақымшылық заңы күшіне енгенге дейін қарызы мен өсімпұлдарын төлеп қойған адамдар болса, оларға өсімпұлдың ақшасы қайтарылады.
