Осыған дейін мәдениет және спорт министрі қызметін атқарған Арыстанбек Мұхамедиұлы айлығының қанша екенімен бөлісті, деп хабарлайды Neonomad.kz шенеуніктің Facebook желісіндегі пақаршасына сілтеме жасап. 

Мұхамедиұлының сөзінше, министр кезінде жалақы 980 мың теңгені құраған.

Белгілі болғандай, әлеуметтік желіде біреулер экс-министрдің еңбекақысын 3 млн теңге көлемінде болады деп ақпарат таратқан. Осыған байланысты ол пікір білдіріп, шындықты айтып салды.

«Достарым, жалақымның қанша болатыны әлі өзіме де белгісіз болып тұрғанда, мынандай жалған ақпарат тарап кетті. 3 млн теңге көлеміндегі еңбекақы деген жалған. Мұндай шындыққа жанаспайтын ақпарат тарату кімге пайда әкелетінін білмеймін, fake news қолдан жасалғанына күмәнім жоқ. Тым әсіре сілтепті, басқа не айтуға болады. Өздеріңізге аян, көптен бері мәдениет саласы қызметкерлеріне жоғары жалақы беруін сұрайтынмын. Министр қызметін атқарған бес жыл ішінде осы мәселені бірнеше рет көтердім. Егер осындай ақпарат шындыққа жанасса, әрине қуанар едім, өкінішке қарай, бұл әзірге мүмкін емес», – дейді ол.

Оның сөзінше, ҚР Үкіметінің Қаулысы негізінде Ұлттық музей директоры ретінде 172 436 теңге есептеліп, қолына 139 673 теңге берілетінін айтты.

«Нағыз фейк. Жалған ақпаратта менің айлық жалақым ретінде көрсетілген сома менің еңбекақымды 95% көбейтіп, мен 12 айда алатын 1 676 076 теңгені екі есеге арттырыпты», – дейді экс-министр.