Оппозиция ұйымдастырған наразылықтардан соң Боливияда президент сайлау қайта өтетін болды, деп хабарлайды Neonomad.kz ақпараттық агенттігі Азаттық радиосының сайтына сілтеме жасап.
Боливияның қайта тағайындалған президенті Эво Моралес сайлаудың бірінші турының ресми қорытындысын жоққа шығарып, қайта сайлау өткізуге келісті. Елдегі наразылық шараларынан соң ол осындай қадамға барғаны айтылуда.
Сонымен қатар, ол сайлау комиссиясын таратып, жаңадан құруға да келісім берді.
Айта кетсек, Эво Моралес 14 жылдан бері мемлекетті басқарып келеді.
Мұның алдында Америка мемлекеттерінің ұйымы сайлаушылардың шынайы таңдауына жол ашу мақсатында осындай қадамдар жасауға шақырған. Оппозицияның бұл ұсыныспен келісетіні немесе қарсылық акциясын әрі қарай жалғастыратыны әзірге белгісіз.
Еске сала кетейік, ашуға мінген оппозиционерлер мемлекеттік телеарна мен радиостанцияны басып алып, журналистерге жұмыс істеуге кедергі келтірген болатын.
