Азамат Сатыбалдының әйелі Назгүл Қарабалина өз сезімін бірінші білдіргенін айтты. Бұл туралы ол «Оңай емес» бағдарламасында бөлісті, деп хабарлайды Neonomad.kz ақпарат агенттігі Stan.kz сайтына сілтеме жасап.
Ел аузында жүрген әйгілі театр әртісі Азамат Сатыбалдынын жұбайы оған ғашық екенін түсінген кезде оның жүріп жүрген қызы бар екенін айтты.
«Ол бір қызбен жүріп жүрді. Сол кезде оған деген сезімім бар екенін білдім. Жақсы көретінімді түсіндім. Бірақ маған қарамай қойды. Ана қызбен үйленемін деп жүрген, бірақ әңгімесі дұрыс жараспай қалды ғой деймін. Сол кезде мен де пайдаланып қалдым», – дейді Назгүл.
Назгүл Қарабалина жұбайына деген сезімін білдіру үшін блокнотқа хат жазғанын айтты.
«Блокнотқа «Азамат егер менің сені жақсы көретінімді қабылдасаң, түсінсең, онда мен сенің әке-шешеңе барлық жағдай жасайтын едім, бауырларыңды сыйлайтын едім» деп жазғанмын. Сөйтіп ол оқиды. Әке-шеше деген сөз қай еркектің жүрегіне тимесін. Оның алдындағы қызымен осы үшін сөзге келіспей қалған болуы керек. Ал мен сол нәрселерді жазғанмын», – деді актриса күліп.
Блокнотқа жазған хатынан кейін Азамат Назгүлді өзі шақырып, оны сағынғанын айтқан.
