Білім және ғылым министрі дәретханасы аулада орналасқан мектептерге қойылатын талаптарды қайта қарау керектігін айтты, деп хабарлайды Neonomad.kz ақпараттық агенттігі ҚазАқпарат сайтына сілтеме жасап.
Министрдің мәліметінше, 2352 мектептің дәретханасы аулада орналасқан.
Осындай білім беру нысандары 60% Түркістан облысында, 54,6% Алматы облысында, 44% Батыс Қазақстан облысында және 43% Қызылорда мен Шығыс Қазақстан облыстарында.
Тараздағы зорлық ісінен соң білім министрі мектептерге қойылатын талаптарды қайта қарастыруды ұсынды.
«Бізге білім беру нысандарына қойылатын біліктілік талаптарын қайта қарап, санитарлық ережелер мен нормаларда даладағы дәретханалар мүлдем болмауы тиістігі жазылу үшін Денсаулық сақтау министрлігіне жүгіну қажет шығар. Мұндай жағдайда жергілікті атқарушы органдар мектеп лицензиясы болуы үшін, мектеп жұмысын одан ары жалғастыруы үшін шынымен де шынайы шаралар қабылдауға мәжбүр болады,- деді ол.
Аймағамбетов бұл мәселеге қатысты нақты жол картасы болуы тиістігін айтты.
«Бір күннің ішінде ешкім де жылы дәретхана сала алмайды. Шалғайда орналасқан елді мекендер бар. Дегенмен, проблеманы шешу қажет», – деді білім және ғылым министрі.
