Жуырда ғана вице-премьер болып тағайындалған Бердібек Сапарбаев екі сиырмен ақша табудың жолын айтты, деп хабарлайды Neonomad.kz ақпараттық агенттігі. 

Халықты еңбекке шақырған Сапарбаев екі сиырмен өмір сүруге болатынын айтты. Оның сөзінше, сиырларға күтім болса жеткілікті.

«Жанұя» отбасылық институтын қолдау орталығының ашылу салтанатында сөз сөйлеген вице-премьер мәселе екі сиырда емес, еңбекқорлықта дейді.

«Бәріміз ауылдан шыққанбыз. Әрине 1-2 сиыр бағып өмір сүруге болады. Бірақ ол үшін жануардың жағдайын жасау керек. «Жем-шөп жоқ» деп шағымданады. «Жоқ-жоқ» дей берсе, ештеңе де болмайды.

Ешкім жем-шөп әкеліп бермейді.  Егер сиырды дұрыс қоректендірсе 7-8 литр сүт алуға болады. Мысалы, 2-3 литрін өзіңізге алсаңыз, қалған сүттен май, құрт не қаймақ алуға болады. Көбіміз ауылда өсіп, мал баққан елміз.

Мәселе екі сиырда емес, мәселе еңбекқорлықта.  30 дамыған елдің қатарына кіргіміз келеді. Ол үшін балаларды жас кезінен еңбекке баулу керек», – деді вице-премьер.