Минск қаласында Козлов атындағы электр техникасы зауытының жұмысшылары ереуілге шықты, деп хабарлады Nexta телеграм-арнасы. Бұның алдында елдегі барлық кәсіпорындардың жұмысшыларын 11 тамызда ереуілге шығуға үндеген, деп хабарлайды Neonomad.kz ақпарат агенттігі.
Жалпыұлттық наразылықтың мақсаты – «Светлана Тихановскаяны жаңа президент деп танып, саяси тұтқындардың барлығын босату, жаңадан әділ сайлау өткізу», деп хабарлады телеграм-арна.
«Жақын арада саяси және экономикалық өзгеріс болмайды. Біз күтуден шаршадық, сол себепті жалпыұлттық наразылыққа үндедік. Наразылықтың бұл түрі Конституцияда айтылған. Ол үшін ешкімді ұстамайды, жұмысшылардың барлығын шығарып жібере алмайды» делінген үндеу мәтіні Интернетте тарады.
Беларусьта президент сайлауынан кейін наразылық тұтанып, дүйсенбі күні де жалғасқан. Кейбір жерлерде арнайы жасақ пен наразылар қақтығысқан. Билік Минскідегі акция кезінде бір демонстранттың қаза болғанын растады.
9 тамызда өткен президент сайлауында қазіргі басшы Александр Лукашенко жеңімпаз деп жарияланған еді. Светлана Тихановская елді 1994 жылдан бері басқарып келе жатқан авторитар басшы Лукашенконың сайлау кезіндегі басты қарсыласы болды.
