Қазақстан мұсылмандары діни басқармасының төрағасы, Бас мүфти Серікбай қажы Ораз қазақстандықтардан Құрбан айт қарсаңында мал бағасын шарықтатып жібермеуді сұрады, деп хабарлайды Neonomad.kz ақпарат агенттігі.

«Баршаңызды келе жатқан Құрбан айт мерекесімен құттықтаймын. Айт қабыл болсын! Отбасыларыңызға бақ пен береке, ырыс пен ынтымақ алып келсін. Алла амандығын тілеймін! Көрші мен дос-жаранға, туыс пен бауырға айттап бару, қадірлі қонаққа айттық беру – ертеден келе жатқан мұсылмандық дәстүріміз. Осы игі дәстүрді қоғамда қайта жаңғыртып, жастарға үлгі-өнеге көрсетуге шақырамын», – Серікбай қажы Ораз.

Әрі қарай Бас мүфти құрбандық шалу арқылы мұсылман қауымның Аллаға жақындай түсетінін айтты.

«Құрбан» сөзі «жақын болу», «жақындау» деген ұғымдарды білдіреді. Мұсылман баласы айт күні құрбандық шалу арқылы Аллаға деген ақ ниетін паш етеді. Өйткені, Алла Тағала қасиетті Құранда: «Ұмытпаңдар, олардың еті де, қаны да ешқашан Аллаға жетпейді. Оған жететін нәрсе – жүректеріңізге ұялаған тақуалықтарың (шынайы ниеттерің)» («Хаж» сүресі, 37-аят) деп адал ниеттің маңыздылығын атап өткен.

Ардақты ағайын! Құрбан айтта орындалатын ең қайырлы амал – құрбан шалу. Айт күні жағдайы бар кісілер құрбан шалып, оны қараусыз қалған қариялар мен жетімдерге, көпбалалы отбасыларға таратып, сауап алуға тырысады. Алайда, айт күндері мал бағасы қымбаттап кететін жағдай жиі орын алады. Осы ретте отандастарымды мал бағасын шарықтатпай, пайдаға емес, сауапқа бөленуге үндеймін. Өйткені, Құрбан айт – қанағат пен қайырымдылықтың мерекесі! Алла Тағала баршамызды айттан айтқа аман-есен жеткізіп, ізгі істер мен қуанышты сәттерде бас қосуымызды нәсіп еткей! Әмин!» – деді Серікбай қажы Ораз.

Естеріңізге сала кетсек, осы уақытқа дейін Тоқаевтың Құрбан айт қарсаңында журналист пен қоғам қайраткеріне рақымшылық жасағаны туралы хабарлаған едік.