Жаркент қаласында борышын өтеп келген әскерді психикалық ауытқу белгілері бар деп емделуге жіберген, деп хабарлайды Neonomad.kz ақпараттық агенттігі КТК арнасына сілтеме жасап. 

Нұрсұлтан Қалыбек Жаркент қаласындағы 74261 әскери бөлімінде Отан алдындағы борышын өтеп келді. Алайда әскерге дені сау болып кеткен 19 жастағы жас жігіт қазір жағдайы мәз емес. Дәрігерлердің пікірінше, ол жынды болудың аз-ақ алдында тұр.

Мамыр айында десантшылар қатарына қосылып, бүгінде бетін бүркеп, селкілдеп отырған сарбазды дәрігерлер психиатриялық стационарға жіберді, дейді жігіттің анасы.

«Кешегіге дейін олар протрузия, остеохондроз, жалпақтабан деген диагноз қойған. Келеді де, баланы «псих» деп шығарады. Сарбазға бергеніме өкінемін. Сап-сау, құлшынып аттанған бала осындай жағдайға түсті. Бұрынғыдай емес балам. Ол өтірікті жаны сүймейтін. Шындықты бетке айтатын бала еді. Не үшін кепкасын басып отыр. Өйткені ар жағында шындық жоқ. Оны көргісі келмейді. Қысым көрсеткен. Қысым көрсетпесе, бала мұндай бола ма?», – дейді сарбаздың ашынған анасы Гүлнар Сарытбекова.

Жігітті «десантшы болуға жарамсыз» деген 74261 әскери бөлімнің командирі оның әскери комиссариаттан өткеніне аң-таң.

«Ол өзі ауру бала екен ғой. Біздің арамызда жүруге болмайды ғой. Аяғы ісіп бастады. Мен өзім оның ерекшеліктерін байқамадым. Тыныш бала болды дейді» ,- дейді Арман Асанбай.

Қазір жас жігіт Нұр-Сұлтан қаласындағы бас әскери клиникалық госпитальда емделеді.Психиатрлардың айтуынша, оған диагноз қою үшін кемі бір апта уақыт керек.

Ал сарбаздың анасы болса баласын осындай күйге жеткізгендерді тауып, жазаға тартқызуды көздеп отыр.