Қазақстан Ұлттық банкі 200 теңгелік монета қолданысқа шығарылатынын айтты, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.
Ұлттық банктің ақпаратынша, айналыста жүрген қолма-қол ақшаның сапасын қамтамасыз ету – маңызды міндеттердің бірі. Бұл банкнотты эстетикалық тұрғыдан қабылдау, оның санитарлық қауіпсіздігі және қорғалу мәселесі.
«Төмен номиналдағы банкноттар 1-1,5 жыл ішінде тозады. Салыстыру үшін, жоғары номиналдағы банкноттар және монеталардың қолданылу мерзімі көбірек. Монеталардың қолданылу мерзімі – 10-15 жыл», – деді Қолма-қол ақша айналысы департаменті басшысы Жомарт Қажмұратов.
Сондықтан Ұлттық банк номиналы 200 теңгелік монетаны шығаруға шешім қабылдаған.
«Номиналы 200 теңгелік банкноттар заңды төлем құралы болып қалады және төлемдердің барлық түрлері бойынша қабылдануға міндетті. Олар табиғи тозуына қарай айналымнан алынатын болады», – деді Ұлттық банктің өкілі.
