Қазақстанда жасы алпыс бестен асқан адамдардың көшеде жүріп-тұруы шектелді, деп хабарлайды Neonomad.kz ақпарат агенттігі Sputnik Қазақстан сайтына сілтеме жасап.
Бұл туралы бас мемлекеттік санитарлық дәрігер Айжан Есмағамбетованың жаңа қаулысында айтылған.
«Жасы 65-тен асқан азаматтардың көшеде жүруі шектелсін. Оларға азық-түлік пен дәрі-дәрмек үйлеріне жеткізілсін», делінген құжатта.
Сонымен қатар, қаулыға сәйкес, әуежай, теміржол және автовокзал ғимараттарына жолаушыларды шығарып салушылар мен күтіп алушылардың кіруіне шектеу енгізілді.
6 сәуірден бастап барлық орта білім беру ұйымы қашықтан оқытуға көшеді.
Еске сала кетсек, бүгін Нұр-Сұлтан және Алматы қалаларында 30 наурыз бен 5 сәуір аралығында кәсіпорындар мен ұйымдардың жұмысы уақытша тоқтатылатыны хабарланды. Мұндай шешім төтенше жағдай режимін қамтамасыз ету жөніндегі мемлекеттік комиссияның селекторлық отырысында қабылданды.
