Қазақстанда зертханалық қызметтер мен жеке қорғаныш құралдарының бағасы төмендеді, деп хабарлайды Neonomad.kz ақпарат агенттігі Sputnik Қазақстан сайтына сілтеме жасап.
Агенттік президенттің тапсырмасымен зертханалық қызметтер мен жеке қорғаныш құралдарының бағалық саясатына мониторинг жүргізген.
«Нәтижесінде ПТР-тест бағасы 36 нарық субъектісімен ашық сауда саясатын көздейтін монополияға қарсы комплаенс жасау арқылы 18 000 теңгеден 9 000 теңгеге дейін төмендетілді. «Олимп» КДЗ» ЖШС және «Инвиво» ЖШС 9 мың теңгеден аспайтын баға белгіледі, «Сұңқар» ЖШС және «Әйгерім» ЖШС-ның жекелеген зертханалары бағаны 6 000 және 7 000 теңгеге дейін төмендетті», – делінген ведомствоның ресми сайтында.
Сонымен қатар, медициналық маскалар да біршама арзандады.
Өндірушілер бағаны бір данасына орта есеппен 21 теңгеге дейін түсірген, дистрибьюторлар мен бөлшек сауда желілерінің үстеме бағасы 20 теңгеден 3 теңгеге дейін төмендеді. Осылайша бір бетперденің бағасы орта есеппен 60 теңгеден 26 теңгеге дейін төмендетілді.
Президент Қасым-Жомарт Тоқаев коронавирус індетінің екінші кезеңіне дайындық мәселелері жөніндегі кеңесте ПТР-тест пен бетперде бағасын төмендетуді тапсырған еді.
