Елімізде қызылша дертінен көз жұмғандардың барлығы дерлік вирусқа қарсы екпе жасамаған болып шықты. Сондықтан енді мектеп жасына дейінгі балаларды вакцинациялау заңмен міндеттеледі, деп хабарлайды Neonomad.kz ақпараттық агенттігі КТК телеарнасына сілтеме жасап.
Бұл туралы Денсаулық сақтау министрі мәлімдеді. Оның сөзінше, вакцинациядан бас тартатындар көп жағдайда жалған, негізсіз ақпараттың жетегінде кеткендер.
Елдің болашақы денсаулығы туралы заңдағы кодекске енгізілетін түзету 6 рет қоғамдық талқылаудан өтіп, 43 мемлекеттік мекеме түзету ұсынған.
Осы кодекс трансплантация мен вакцинацияның төңірегінде әңгіме өрбіткен кешегі жиында тағы талқыға түсті. Денсаулық министрімен кездесуге келген халықтың арасынан бір келіншек сөз алды. Ол екпенің пайдасын көрем деп, баласынан айрылған ана.
– Мен міндетті екпеге түбегейлі қарсымын. Қазіргі уақытта бұл ұстанымымды барлық жерде айтып, халықаралық сарапшылармен байланысқа шығамын. Себебі, біздің шенеуніктер мен ақша қуған дәрігерлерге сенуден қалдым.
Келіншектің шырқырайтын жөні бар. Екі жасар баласы екпеден соң көз жұмған. Шарқ ұрған ананың тауы шағылып, министрдің алдында жағдайын айтудан басқа лажы қалмапты. Алайда министр Біртанов «бізбен байланысқа шығып, хат жолдаңыз» дегеннен басқа жөнді жауап қата алмай, ақталған кейіпте әңгімелерін вакцинацияның пайдасы жағына ойыстырып жіберді. Келтірілген деректерге сенсек, биылға 21 вирусқа қарсы екпе жасауға 26 миллиард теңге бөлінген.
«Әрбір көтерілген мәселе – маңызды. Бұл жай мәселе емес. Бізге де, осы бүгінгі жиналысқа қатысып отырған әріптестерімізге, парламент депутаттарына. Бұл елдің денсаулығын арттыруға атқарылып жатқан жұмыс. Бұл жай заң емес, бұл елдің болашақ денсаулығы туралы заң. Мамандардың дерегінше, вакцинациядан бас тартатындар көп жағдайда жалған, негізсіз ақпараттың жетегінде кеткендер», – Елжан Біртанов, Денсаулық сақтау министрі.
«Екпелерге қатысты теріс көзқарасты қалыптастырудың өзі қолдан қасақана жасалған амал», – дейді еліміздің Бас санитар дәрігері.
«Екпеге қарсы компанияға үлкен фармкомпаниялардың тізгінін ұстаған адамдар арнайы тапсырыс береді. Мұндай деректердің халықаралық деңгейде 57 пайызы дәлелденген. Неге десеңіздер, екпенің арқасында талай вирустық дерттің алдын алуға болады. Бұл дәр-дәрмектің саудасы тоқырайды деген сөз», – Жандарбек Бекшин, Қоғамдық денсаулық сақтау комитетінің төрағасы.
Ресми деректер бойынша, қызылша дертінен, биыл 21 адам көз жұмған. Соның 19-на аталған вирусқа қарсы екпе жасалмаған боп шықты. Қызылшадан қайтыс болғандардың басым көпшілігі – балалар. Сондықтан жаңа кодекс бойынша енді мектепке дейінгі жастағы балаларды вакцинациялау міндетті талап болмақ.
