Ұлттық банктың төрағасы Досаев мырза ет пен нанның бағасы қымбаттайтынын ескертті, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап.
Ерболат Досаевтың сөзінше, еуразиялық экономикалық одақта (ЕАЭО) жаңа талаптардың күшіне енуіне байланысты Қазақстанда ет пен нан қымбаттауы мүмкін.
«Қысқа мерзімдегі кезеңде ЕАЭО-да жаңа талаптарды енгізу аясында азық-түліктің кейбір түрлері, атап айтсақ, дәнді-дақылдар мен сүт өнімдері бағасының өсуі нәтижесінде ет пен нан қымбаттауы мүмкін», – деді Досаев үкімет отырысында.
Он бір айдың қорытындысы бойынша республиканың 5 өңірінде азық-түлік едәуір қымбаттаған. Ұлттық экономика министрі Руслан Дәленовтің айтуынша, бағаның ең көп өсуі Алматы (15,2%-ке), Атырау (14,9%-ке), Нұр-Сұлтан (14,2%-ке), Қарағанды (13,7%-ке), Қостанай (13,6%-ке) және Жезқазған (13,4%-ке) қалаларында байқалды.
Алайда азық-түліктің қымбаттауына әкімдіктер кінәлі екен. Сауда және интеграция министрі Бақыт Сұлтанов осындай пікір білдірді.
Айтуынша, жергілікті атқарушы органдарда бағаны шекті мәннен асырмау үшін барлық тетік бар. Министрлік талай рет ескерту жасаған, жауапқа тартқан. Бірақ құлақ асар ешкім жоқ.
«Жыл басынан біраз әлеуметтік маңызы бар тауар бағасының 10 проценттен жоғары өскенін байқап отырмыз. Бағаны ұстап тұруға жергілікті атқарушы органдарда барлық мүмкіншілік бар. Алайда жыл басынан бері 66 позиция бойынша баға 15%-тен көп өскен. Бірде бір жағдайда тиісті міндеттемелер орындалмағанын көріп отырмыз. Бұл туралы жергілікті атқарушы органдарға өткен айда да айтылды, жауапқа тартылды. Бірақ нәтиже жоқ», – деді Сұлтанов.
