Елімізде азық-түлік бағасы тағы да өсіп келеді. Әсіресе жұрт күнделікті тұтынып отырған көкөністер мен ет, ұн өнімдері шарықтап кеткен. Мұны үкiмет отырысында ұлттық экономика министрi Руслан Дəленовтің өзі айтты. Одан қалды қазақстандықтардың орташа жалақы көлемі артқанымен, тауар сатып алу мүмкіндігі нашарлап барады. Осы себепті премьер-министр азық-түлік бағасын бақылай алмаған әкімдерге шүйлікті, деп хабарлайды Neonomad.kz ақпарат агенттігі Еуразия бірінші арнасына сілтеме жасап.
Жиын терін уақыты жақындап қалса да, әлі күнге дейін жұрт жиі тұтынатын көкөністердің бағасы қымбат болып отыр. Сауда және интеграция министрі Бақыт Сұлтанов бағаның өсуіне өндірістің реттелмеуі, тиімсіз делдалды, алып-сатарларды кінәлайды.
Республика бойынша әлеуметтік маңызы бар азық-түлік тауарларының арасында келесі өнімдердің бағасы өскені байқалады:
- пияз – 79,0%;
- сәбіз – 59,3%;
- картоп 32,9%;
- күріш – 23,8%;
- бірінші сұрыпты ұн – 15,3%.
Осылайша әлеуметтік маңызы бар 19 өнім бойынша айтарлықтай қамбатшылық байқалған. Өсім көлемі шамамен 9 процентті құрайды. Бірақ әр өңірде көрсеткіш әрқалай. Мәселен, Жезқазған қаласында 11,8%, Талдықорғанда 10,4% процентке өскен. Ал елордада әлеуметтік маңызы бар азық-түлік тіпті 15 процентке қымбаттап көш бастаған. Шарықтаған бағаның қалтаны қағып жатқанын бас қаланың тұрғындары да мойындайды.
«Базарға 5-6 мың теңге алып келесің, алған затың дымға жетпейді. Азық-түлік жағынан ваще қиын. Күнкөріс деген қиын. Алып отырған айлығымыз жетпейді», «Әрине, қымбат. Былтыр картоптың, пияздың бағасы әлдеқайда арзан еді. Биыл тіпті ұшып тұр», «Қазақстанда болған соң, барлығы арзан болса екен дейміз. Кішкене қымбаттап жатыр. Оны да сезініп жатырмыз. Күнделікті қажетті зат болған соң амал жоқ аласың» дейді қала тұрғындары.
«Біз барлық жерде пияз, сәбіз, картоп, күріш, ұн бағасының елеулі өскенін байқап отырмыз. Бағаның өсуіне өндірістің реттелмеуі, тиімсіз делдалдың тым көптігі, азық-түлікті сақтау шартының орындалмауы және тұтынушыға дейін кепілдендірілген жеткізу арналарының жоқтығы себеп болып тұр», – деді ҚР Сауда және интеграция министрі Бақытжан Сұлтанов.
Ал үкімет басшысы әуелі министрлерді, сосын әр өңірдің басшыларын тыңдады. Сосын облыс әкімдерін азық-түлік бағасының тым жоғарылап кеткені үшін сынға алды.
«Бұл мәселеге мемлекет басшысы үлкен мән береді. Есептерге сай, кейбір азық-түліктердің бағасы өсіп бара жатыр. Бұл дегеніміз, біріншіден, әкімдіктер тарапынан іске асырылатын шаралар тапшылығын айқындайды», – деді ҚР премьер-министрі Асқар Мамин.
Осыдан кейін Асқар Мамин үкімет 10 негізгі азық-түлік өнімінің бағасын ұстап тұру үшін барын салатынын айтты. Оған жауапты экономика министрлігі ол тауарлардың бағасын қатаң бақылауға алмақ. Оның ішінде сиыр еті, қой еті, картоп, пияз, ұн және нан бар.
«Бағаларды ұстап тұру үшін жаңа құралдар әзірленді. Енді нақты 10 негізгі азық-түлік бойынша күшейтілген бақылау жүргізіледі. Сондай-ақ олардың бағаларын төмендету бойынша шаралар қабылданып жатыр», деді ҚР ұлттық экономика министрі Руслан Дәленов.
Ал сауда және интеграция министрі Бақыт Сұлтанов қазақстандықтарды азық-түлік бағасын бақылауға тартуды ұсынып отыр. Яғни кез келген азамат тауардың бағасын суретке түсіріп, әлеуметтік маңызы бар азық-түлік бағасының статистикасы жинақталатын арнайы порталға жібере алады. Бұл жүйе арқылы дүкендердегі тауарлардың құнын онлайн режимде бақылауға болады. Егер үкімет бұл ұсынысты қолдаса, министрлік өзге де құзырлы органдармен бірлесіп, жүйені қысқа мерзімде енгізуге дайын екен.
