Енді ақша айырбастау пункттерінің жұмыс уақыты шектеледі, деп хабарлайды Neonomad.kz Ұлттық банкке сілтеме жасап.
Қазақстанда валюта айырбастау пунктері сағат 10-нан 19:00-ге дейін жұмыс істейтін болады.
«ҚР қолма-қол шетел валютасымен айырбастау операцияларын ұйымдастыру қағидаларын бекіту туралы» Ұлттық банк басқармасының қаулысының жобасына жарияланды.
«Айырбастау пунктінің жұмыс режимін қолма-қол шетел валютасымен айырбастау операцияларын жүзеге асыруға құқығы бар заңды тұлға белгілейді. Пункт 10:00-ден 19:00-ге дейінгі шекте жұмыс істеуі керек», – деп жазылған қаулы жобасының 33-2 тармағында.
Сонымен қатар, енді әрбір айырбастау операциясы бойынша тізілімдер журналы жүргізіледі. Құжаттың 51-тармағында сол журналда қандай мәлімет жазылатыны көрсетілген. Олар: клиенттің аты-жөні, жеке басын куәландыратын құжаттың түрі, берілген күні, нөмірі, қолданылу мерзімі.
Құжат 2019 жылдың 16 тамызына дейін «Ашық НҚА» порталында талқыланады.
