Қазақстан президенті Қасым-Жомарт Тоқаев 12 мамырда Алматыға барған сапары кезінде орта тап өкілдері үшін табыс салығы өзгермейтінін мәлімдеді, деп хабарлайды Neonomad.kz ақпарат агенттігі.
Қазіргі қолданыстағы заңға сәйкес, айлықтан 10 процент табыс салығы ретінде алынады.
«Менің түсінігімше, 250–300 мың теңге (600-700 доллар шамасы) табыс тапқан адам 10 проценттен артық салық төлемеуі тиіс. Одан жеті процент көлемінде салық алынуы мүмкін. Ал орта тап өкілдерінен бұрынғыдай 10 процент салық алынады. <…> Былайша айтқанда, 300 мың теңгеден мың жарым, мүмкін екі миллионға дейін табыс табатындар 10 процент салық төлей береді», – деді Тоқаев.
Оның пікірінше, жылына 25 миллион теңгеден көп табыс табатын азаматтар 10 проценттен көп салық төлеуі тиіс.
«Мұны үкімет комиссиясы шешеді. Бұл 13 немесе 15 процент болуы мүмкін, бірақ 15 проценттен көп болмайды»,- деді Тоқаев.
Қазақстан президенті Тоқаев 11 мамырда мемлекеттік комиссия отырысында «әділдік үшін жеке табыс салығының үдемелі шкаласын енгізу керегін» айтқан. Билік бұл өзгеріс «конвертпен жалақы төлеу ісін» азайтады деп үміттенеді. Экономика министрінің орынбасары Мади Такиев «табыс салығының үдемелі шкаласын арнайы жұмыс тобы анықтайды» деп мәлімдеді.
«Салық мөлшері ашық талқыланады. Жұмыс енді басталды. Табыс көлемі, салық шкаласы әлі анықталған жоқ. Оны қоғаммен ақылдасамыз. Барлық шынайы ақпарат жұмыс тобынан тарайды, қалғанының бәрін фейк деп қабылдау керек» деді ол.
2007 жылға дейін Қазақстанда үдемелі салық шкаласы болған. Кейін бұл жүйені жойып, бәріне ортақ салық мөлшері белгіленген. Ол кезде де билік «бұл жүйе жұрттың жасырын табысын ашады» деп мәлімдеген еді.
