Білім алуда айрықша оқу мұқтаждығы бар балалар «АЯЛА» қайырымдылық қорынан мобилді интернетке қосылған 20 жаңа планшет алды. Олар енді арнайы бағдарлама бойынша дефектолог-мұғалімдермен оқуын қашықтан жалғастыра алады, деп хабарлайды Neonomad.kz ақпарат агенттігі.
Қашықтан оқытуға көшу түзетуші мектеп-интернаттар үшін біршама қиындық туғызып отыр. Жалпы білім беру мекемелерінің оқу бағдарламасы әмбебап: ол барлығына қолайлы және теледидар арқылы таратыла алады. Арнаулы мектептерде сабақтар айрықша түзету бағдарламалары бойынша өткізіледі. Сондықтан қашықтан оқытқан кезде білім беру процесі бұрынғы деңгейінде жалғасуы үшін дефектолог-мұғалімдердің қосымша өте көп күш салуына тура келеді. Олар өз сабақтарын жазып алып, YouTube каналына салады. Ата-аналарына кеңес береді, оқушыларға тапсырманы орындаудың қадамдық реттілігімен және материалдың қосымша түсіндірмесімен бейне нұсқаулықтар береді.
№2 арнаулы мектеп-интернатта айрықша білім беруге мұқтаж 280 бала оқиды, олардың 95-і үйінде оқып отыр. Көктемгі каникул уақытында бұл мектептің басшылығы ата-аналармен және педагогтармен бірге олар үшін мектеп сабақтарының қашықтан жүргізілетін оңтайлы режимін әзірледі. Әр баламен дербес жұмыс жүргізудің ерекшеліктерін ескере отырып, икемді кесте жасалды. Бұдан кейін олар оқудың неғұрлым ыңғайлы нысанын белгіледі және сабақ оқыту үшін отбасында компьютерлік техникасының бар-жоғын анықтады. Екі отбасына мектеп өзінің оқыту компьютерлерін берді, ал 10 отбасы үшін планшеттер сатып алу мүмкіндігін қарастырды.
«Біз «АЯЛА» қорының көмегіне қатты қуанып отырмыз. Біздің мұғалімдеріміз оқушылармен бейнебайланысқа WhatsApp арқылы шығады, өйткені бұл – олардың ата–аналарының таңдауы. Сондықтан қордың планшеттері күн көрісі төмен және көпбалалы отбасылардың балаларына білім алуды жалғастыруына жәрдем береді. Біздің оқушыларымыздың өз мұғалімін көріп отыруы, жеке сабақ алуы және қажет болса қоңырау шалуы немесе бейне байланыспен тілдесуі өте маңызды. Планшеттер олардың ата–аналарына да керек, енді олар қажет болған жағдайда мектептің арнайы мамандарынан онлайн ақыл–кеңес ала алады. Жалпы, планшеттер арқылы оқу біздің оқушыларымыздың дамуына және олардың қарым–қатынастық дағдыларын жақсартуға көмектеседі деп санаймын», – деді №2 мектеп–интернаттың директоры Бахриддин Сарбасұлы Кәрімжанов.
«АЯЛА» қоры берген планшеттердің арқасында бұл мектеп-интернаттың оқушылары тек оқып қана қоймай, онлайн-конкурстарға, челлендждерге, сынып сағаттарына қатыса алады, ал ата-аналары – ата-ана жиналыстарына онлайн қатыса алады.
Мобилді интернет топтамасына қосылған тағы 10 планшет Нұр-Сұлтан қаласындағы № 1 психологиялық-педагогикалық түзету кабинетінде оқитын мүгедек балалары бар көпбалалы және күн көрісі төмен отбасыларына берілді. Оқытудың және арнайы түзету сабақтарын өткізудің үздіксіздігі БМС, Даун синдромы, сондай-ақ аутизмі бар балалардың дамуында жетістікке қол жеткізу үшін өте маңызды. Сондықтан планшеттер балалардың ғана емес, сондай-ақ ата-аналарының сабақтар режимін, қарқындылығын және ұзақтығын сақтауына көмектеседі. Бастысы – кез келген қажеттілік жағдайында олар кәсіби педагог-дефектологтардан бейне-кеңес ала алады.
